विक्रमगड तालुक्यातील हातणे येथे असलेल्या रिव्हेरा करोना रुग्णालयात रविवारी संतापजनक प्रकार घडला. जेवणात चक्क अळ्या आढळून आल्याने युवा प्रहार आदिवासी संघर्ष समितीने संताप व्यक्त केला.
तालुक्यातील रिव्हेरा करोना रुग्णालयात जवळपास ४२ रुग्ण उपचार घेत असून सुमारे ५० कर्मचारी रुग्णांना सेवा देतात. रविवारी येथे मांसाहारी जेवण येते. चिकनच्या जेवणात रुग्ण, वार्डबॉय व परिचरिकांना चक्क अळ्या आढळून आल्याचे युवा प्रहार आदिवासी संघर्ष समितीने सांगितले. खळबळजनक घटनेने सर्वत्र संताप व्यक्त केला जात आहे. ठेकेदाराने मृत व खराब कोंबड्यांचे मांस वापल्याचा आरोप संघर्ष समितीने केला. करोना रुग्णांच्या व कर्मचाऱ्यांच्या जीवाशी खेळ करणाऱ्या दोषींची चौकशी करून तातडीने कारवाई झाली पाहिजे, अशी मागणी करण्यात येत आहे. याबाबत रुग्णालयाचे वैद्यकीय अधिकारी डॉ. रामदास मराड यांना विचारले असता काहीच रुग्णांना अळ्या असलेले जेवण आढळले असून चौकशी सुरू आहे, चौकशीअंती याबाबत योग्य ती कार्यवाही केली जाईल, असे त्यांनी सांगितले.