कल्याण पूर्वेस राहणारी मूकबधीर तरुणी शुक्रवारी पहाटे ५.३० वाजण्याच्या सुमारास कामावर निघाली होती. सुभाष चौकातून ती रुग्णालयाच्या बाजूच्या गल्लीतून पायी रेल्वे स्टेशनकडे जात असताना पार्किंगजवळील निर्जन ठिकाणी एका चोरट्याने तिच्या हातातील मोबाइल खेचून पळ काढला. मोबाइल परत मिळवण्यासाठी या तरुणीने चोरट्याचा पाठलाग केला. मात्र तो पळत रेल्वेच्या बंद असलेल्या क्वार्टर्सच्या दिशेने गेल्याने तीदेखील त्याच्या मागे धावली. ही संधी साधत चोरट्याने तिला पकडून बंद इमारतीत नेले आणि तिच्यावर बलात्कार केला. मूकबधीर असल्याने ती आरडाओरडा करू शकली नाही. बलात्कार करून चोरट्याने पळ काढला. घाबरलेली तरुणी रडत घरी पोचली.
घडलेल्या प्रकाराने धक्का बसलेल्या तरुणीच्या कुटुंबीयांनी महात्मा फुले चौक पोलिस ठाणे गाठून तक्रार दाखल केली. पीडित तरुणीच्या वतीने दुभाषी तरुणीने दिलेल्या फिर्यादीवरून पोलिसांनी बलात्कारासह लुटीचा गुन्हा दाखल केला. पीडितेची वैद्यकीय तपासणी केली असून पोलिसांना या अहवालाची प्रतीक्षा आहे.
पोलिस फौजदार मंजुषा शेलार यांच्याकडे या प्रकरणाचा तपास देण्यात आला आहे. आरोपीचा माग काढण्यासाठी स्थानिक पोलिसांची पथके तयार करण्यात आली आहेत. पहाटे निर्जन स्थळी एखाद्या गर्दुल्ल्याने हे कृत्य केल्याची शक्यता असून पोलिस लवकरच आरोपीपर्यंत पोहचतील, असा विश्वास महात्मा फुले पोलिस ठाण्याचे गुन्हे विभागाचे पोलिस निरीक्षक संभाजी जाधव यांनी व्यक्त केला.