करोनाबाधित रुग्णांची संख्या कमी होत असताना, आता मृत्यूदरही कमी झाला आहे. पुणे, पिंपरी-चिंचवड आणि जिल्ह्याच्या ग्रामीण भागांतील मृत्यूदर गेल्या सहा आठवड्यांनंतर कमी होऊन १.७ टक्क्यांपर्यंत पोहोचला आहे. तीन ते नऊ जून या कालावधीत सर्वाधिक मृत्यूदर तीन टक्के होता.
करोनाची दुसरी लाट ओसरू लागली असताना, जिल्ह्यातील करोनाबाधित रुग्णांच्या मृत्यूदराचा आढावा जिल्हा प्रशासनाकडून घेण्यात आला आहे. त्यानुसार २० मेनंतर पहिल्यांदाच मृत्यूदर १.७ टक्क्यांपर्यंत कमी झाला आहे. २० ते २६ मे या आठवड्यात २२ हजार ११५ रुग्ण होते. त्यापैकी ६०६ रुग्णांचा मृत्यू झाला होता. त्यामुळे मृत्यूदर २.७ टक्के होता. २७ मे ते दोन जून या आठवड्यात रुग्णांची संख्या १३ हजार ६६९ होती. या रुग्णांपैकी ४०७ रुग्ण मृत्युमुखी पडले होते. त्यावरून मृत्यूदर २.९ टक्के होता. तीन ते नऊ जून या कालावधीत रुग्णसंख्या दहा हजारांपेक्षा कमी होऊन नऊ हजार ५५५ झाली होती. त्यापैकी २९० रुग्ण दगावल्याने मृत्यूदर तीन टक्क्यांपर्यंत पोहोचला होता. त्यानंतर मृत्युदरात घट होत गेल्याचे जिल्हा प्रशासनाकडून सांगण्यात आले.
गेल्या महिन्यात दहा ते १६ जून या कालावधीत आठ हजार ३१५ रुग्णांमधील १५७ रुग्णांचा मृत्यू झाल्याने मृत्युदर १.८ टक्के होता. १७ ते २३ जून या आठवड्यात सात हजार ७५५ रुग्णांमधील १४८ रुग्ण मरण पावल्याने मृत्युदर १.९ टक्के झाला होता. २४ ते ३० जून या आठवड्यात आठ हजार १० रुग्णांवर उपचार करण्यात येत होते. त्यापैकी १२० रुग्णांचा मृत्यू झाला. त्यामुळे मृत्यूदर १.७ टक्के झाला. गेल्या सहा आठवड्यांतील हा सर्वांत कमी मृत्यूदर असल्याची माहिती जिल्हा प्रशासनाकडून देण्यात आली.