मुंबईत अमली पदार्थांची तस्करी वाढल्याने त्याविरुद्धची मोहीमही जोमाने सुरू झाली आहे. त्याचवेळी आफ्रिकेतून सुपाऱ्यांचीदेखील मोठ्या प्रमाणात तस्करी सुरू असल्याचे दिसून येत आहे. याअंतर्गत सीबीआयने अलीकडेच मोठे छापे टाकले.
मागील काही वर्षांत राज्यात सुपारीचा व्यवसाय मोठ्या प्रमाणात वाढला आहे. चांगल्या दर्जाची सुपारी केरळमधून उपलब्ध होते. पण त्याचा दर अधिक आहे. त्यामुळे कमी दर्जाच्या सुपारीची परदेशातून तस्करी केली जाते. त्याचा मुख्य हब मुंबईत असल्याचे सीबीआयच्या कारवाईद्वारे समोर आले आहे.
अशाप्रकारच्या तस्करीच्या पार्श्वभूमीवर सीबीआयने मुंबई, नागपूर व अहमदाबाद येथे एकाचवेळी १९ ठिकाणी छापे टाकले. त्यामध्ये या तस्करीशी संबंधित दस्तावेज, काही डिजिटल उपकरणे व अन्य साहित्यासह सुपारीचा मोठा साठा जप्त केला. सुपारीच्या तस्करीमुळे मोठ्या प्रमाणात सरकारी महसूल बुडत आहे. त्यामुळेच ही कारवाई करण्यात आली.
याबाबत सीबीआयतील सूत्रांनी दिलेल्या माहितीनुसार, आफ्रिकेतून ही सुपारी छुप्या मार्गाने आयात होते. अनेकवेळा जहाजातून लपवून हा माल गुजरातच्या बंदरांवर येतो. तेथून अहमदाबादमार्गे मुंबईत येतो. त्याखेरीज काही तस्करी ही मुंबईतील बंदरावर होते. या सर्व सुपारीचा मोठा व्यापार नागपुरात होतो. त्यामुळेच तस्करीचा संबंध परदेश ते अहमदाबाद ते नागपूर मार्गे मुंबई असल्याचे दिसून येत आहे. मुंबईतील व्यापारी गुलाम नुरानी हा या सर्व तस्करीचा म्होरक्या आहे. यासंबंधी हा छापा टाकण्यात आला. तसेच नुरानीवर आता तपास संस्थांनी करडी नजर ठेवली आहे.
यासाठीच आफ्रिकेतून सुपारी
मागील काही वर्षांत महाराष्ट्रात सुपारीचा व्यवसाय मोठ्या प्रमाणात वाढला आहे. चांगल्या दर्जाची सुपारी केरळमधून उपलब्ध होते. पण त्याचा दर अधिक आहे. त्यामुळे कमी दर्जाच्या सुपारीची परदेशातून तस्करी केली जाते.