रशियाची ‘स्पुटनिक-व्ही’ लस मिळवण्यासाठी येणाऱ्या अडचणी लक्षात घेता महापौर मुरलीधर मोहोळ, महापालिका आयुक्त विक्रमकुमार यांनी थेट ‘सीरम इन्स्टिट्यूट’मध्ये जाऊन ‘कोव्हिशील्ड’ लशींसाठी आग्रह धरला आहे. केंद्र सरकारकडून विशेष परवानगी मिळवून किंवा खासगी रुग्णालयांच्या माध्यमातून अधिकाधिक पुणेकरांचे लसीकरण करण्यासाठी पुणे महापालिकेने कसोशीने प्रयत्न सुरू केले आहेत.महापौर मोहोळ, स्थायी समितीचे अध्यक्ष हेमंत रासने आणि महापालिका आयुक्त विक्रमकुमार यांनी शुक्रवारी ‘सीरम इन्स्टिट्यूट’मध्ये त्यांच्या उच्चपदस्थ अधिकाऱ्यांची भेट घेतली. ‘सीरम’कडून अधिकाधिक लस मिळविण्यासाठी महापौरांनी यापूर्वी पत्रव्यवहार केला; तसेच एकदा ‘सीरम’ला भेटही दिली होती. ‘सीरम’चे सर्वेसर्वा सायरस पूनावाला, आदर पूनावाला यांना पत्रव्यवहार करून पुणेकर असलेल्या पूनावालांनी पुणे शहराला लस उपलब्ध करून द्यावी, अशी भावनिक सादही महापौरांनी घातली होती.
या पार्श्वभूमीवर सायरस पूनावाला यांनी ‘पुण्याला लस देण्याची आमचीही मनापासून इच्छा आहे. मात्र, कायद्याच्या चौकटीत ही लस कशी उपलब्ध करून द्यायची,’ असा प्रश्न उपस्थित केला आहे. या पार्श्वभूमीवर महापौर, आयुक्त आणि स्थायी समितीचे अध्यक्ष यांनी शुक्रवारी ‘सीरम’मधील अधिकाऱ्यांची भेट घेऊन त्यांच्याशी चर्चा केल्याचे समजते. केंद्र सरकारने विशेष परवानगी दिली; तर पुण्याला लस उपलब्ध करून देण्यास अडचण राहणार नाही. त्या पार्श्वभूमीवर महापौरांनी केंद्र सरकारशीही संपर्क साधला आहे. मात्र, त्यातही अडचणी उभ्या राहण्याची शक्यता आहे. त्यामुळे खासगी रुग्णालयांच्या माध्यमातून ही लस मिळू शकते का, अशी चाचपणी सुरू करण्यात आली आहे.
खासगी रुग्णालयांना लस खरेदीची परवानगी आहे. या दवाखान्यांनी अधिकाधिक लस खरेदी केल्यास पुणेकरांचे लसीकरण वेगाने होण्यास मदत होणार आहे. लस मिळविण्याचा हा सर्वांत सोपा पर्याय असून त्याचा विचार करण्यात यावा, असा शुक्रवारी झालेल्या चर्चेतील सूर होता, अशी माहिती उच्चपदस्थांनी दिली.
‘सीरम इन्स्टिट्यूट’कडे लस मिळविण्यासाठी गेले दोन आठवडे मी स्वतः बैठका घेऊन पाठपुरावा करत आहे. ‘सीरम’चीही पुण्याला लस देण्याची तयारी आहे. मात्र, त्यासाठी काही तांत्रिक अडचणी निर्माण झाल्या आहेत. त्या अडचणी दूर करण्यासाठी केंद्र, राज्य सरकारशीही माझा पत्रव्यवहार सुरू आहे.
– मुरलीधर मोहोळ, महापौर