आयसीयूमध्ये उपचार घेत असलेला ७२ वर्षीय करोना रुग्ण ऑक्सिजन पाइप वारंवार काढून टाकत असे. गुरुवारी रात्रीही त्याने ऑक्सिजन पाइप काढून टाकला. त्यामुळे प्रकृती खालावली आणि काही वेळात त्याचा मृत्यू झाला. ही माहिती आयसीयूमध्ये काम करणाऱ्या डॉक्टरांनी बाहेर जाऊन नातेवाईकांनी कळविली. यामुळे संतप्त झालेल्या नातेवाईकांनी डॉक्टर आणि अन्य कर्मचाऱ्यांवर हल्ला चढविला. त्यांना मारहाण केली आणि हॉस्पिटलमध्ये तोडफोड करण्यात आली. तोफखाना पोलिस ठाण्यात दोघांविरूद्ध गुन्हा दाखल करण्यात आला आहे.
अहमदनगर शहरातील तारकपूर परिसरातील सिटी केअर हॉस्पिटलमध्ये ही घटना घडली. आयसीयूमध्ये काम करणारे डॉक्टर राहुल अरूण ठोकळ (वय२४ रा. सारोळा कासार, नगर) यांनी फिर्याद दिली आहे. आरोपींनी त्यांच्यासह प्रवीण गायकर यांना मारहाण केल्याचे फिर्यादीत म्हटले आहे. ठोकळ यांनी फिर्यादीत म्हटले आहे की, सिटी कोअर हॉस्पिटलमध्ये करोना वॉर्ड आयसीयूमध्ये त्यांची काल रात्रपाळीची ड्युटी होती. त्यांच्या आयसीयूमध्ये तानाजी नारायण गडाख (वय ७२, रा. टाकळी काझी, नगर) हे ८ मे पासून कोविडवर उपचार घेत होते. त्यांना ऑक्सिजनवर ठेवण्यात आले होते. मात्र, रुग्ण सतत ऑक्सिजन मास्क काढून फेकत असे. त्यामुळे रुग्णाजवळ एका नातेवाईकाला थांबण्याची परवानगी देण्यात आली होती.
बुधवारी १९ मे रात्री अकराच्या सुमारास डॉ. ठोकळ यांच्यासह सर्व कर्मचारी कामात वस्त होते. दुसऱ्या बेडवरील रुग्णांची तपासणी करण्यासाठी ते गेले. शिवाय एका रुग्णाच्या व्हेंटीलेटरमघ्ये अडचण आल्याने ते दूर करण्यासाठी डॉ. ठोकळ गेले होते. त्या काळात रुग्ण गडाख यांनी ऑक्सिजन पाइप काढून टाकला. हे लक्षात येतात तेथील कर्मचारी प्रवीण गायकर यांनी तातडीने धाव घेऊन पाइप पूर्वत केला. मात्र, तोपर्यंत गडाख बेशुद्ध झाले होते. त्यांच्यावर तत्काळ उपचार सुरू करण्यात आले. याची माहिती लेखी आणि तोंडी स्वरूपात त्यांच्या नातेवाईकांना कळविण्यात आली.
त्यानंतर मध्यरात्री साडेबाराच्या सुमारास गडाख यांचा मृत्यू झाला.
डॉ. ठोकळ यांनी याची माहिती त्यांचा मुलगा पंकज तानाज गडाख (वय ३०) व त्याचा मावस भाऊ रोहन बाबासाहेब पवार (वय २१, दोघे रा. टाकळ काझी, नगर) यांना दिली. डॉक्टरांनी मृत्यू झाल्याचे सांगताच ते दोघेही चिडले. डॉक्टरांना शिवीगाळ करू लागले. डॉक्टर ठोकळ ओपीडीमध्ये आले. या दोघांनी तेथे येऊन त्यांना शिवीगाळ व मारहाण केली. उद्या सकाळी तुमच्याकडे पाहून घेतो. तुला जिवंत सोडणार नाही, अशी धमकीही दिली. असे म्हणत आरोपींनी ओपीडीमध्ये तोडफोड केली. त्यांच्यापासून वाचण्यासाठी डॉक्टर आणि सोबतचे कर्मचारी रासकर पुन्हा आयसीयूमध्ये गेले. तर आरोपींनी तेथे जाऊन त्यांची कॉलर पकडून त्यांना ओपीडीमध्ये खेचून आणले. तेथे पुन्हा लाथाबुक्क्यांनी मारहाण केली. त्यामुळे हॉस्पिटलमधून पोलिसांना माहिती देण्यात आली. तोफखाना पोलिस ठाण्याचे पोलिस तेथे आले. डॉ. ठोकळ यांच्या फिर्यादीवरून तानाजी नारायण गडाख व रोहन बाबासाहेब पवार यांच्याविरूद्ध गुन्हा दाखल करण्यात आला आहे.