ठाणे महापालिकेच्या छत्रपती शिवाजी महाराज रुग्णालयात पाच म्युकरमायकोसिस रुग्णांवर यशस्वी शस्त्रक्रिया पार पडल्या. करोना झाल्यानंतर म्युकरमायकोसिस या नवीन बुरशीजन्य रोगाचे नवीन रुग्ण आढळत आहेत. परंतु वेळेत योग्य उपचार घेतल्यास म्युकरमायकोसिस पूर्ण बरा होऊ शकतो. ठाणे महापालिकेच्या छत्रपती शिवाजी महाराज रुग्णालयातील डॉक्टरांनी हे शक्य करून दाखवले आहे. ग्लोबल रुग्णालयाकडून म्युकरमायकोसिसचे पाच रुग्ण छत्रपती शिवाजी महाराज रुग्णालयाकडे आणताच तात्काळ त्यांच्यावर उपचार केले. पहिल्या लाटेत जून ते ऑगस्टदरम्यान दोन रुग्णांवर आणि दुसऱ्या लाटेत फेब्रुवारी ते एप्रिल या कालावधीत ३ रुग्णांवर यशस्वी शस्त्रक्रिया करण्यात आल्या असून योग्य उपचारांनंतर सर्व रुग्ण घरी परतले आहेत. म्युकरमायकोसिसच्या उपचार पद्धतीसाठी डेंटिस्ट, ईएनटी सर्जन आणि आय स्पेशालिस्ट, भूलतज्ज्ञ यांच्या एकत्रित टीमने या सर्व शस्त्रक्रिया केल्या आहेत. यामध्ये मेडिसिन विभागाचे डॉ. योगेश शर्मा, डॉ. सुमन राठोड, शस्त्रक्रिया विभागाच्या डॉ. श्वेता बाविस्कर तसेच डॉ. अमोल खळे यांचा समावेश आहे.