अकोला जिल्ह्यातील बाळापूर तालुक्यातील वाडेगाव येथे एका घराला आग लागल्याची घटना घडली आहे. यामध्ये ३५ वर्षीय महिला जखमी झाली असून घरातील नगदी रुपये, सोन्या-चांदीचे दागिने, संसारोपयोगी साहित्य जळून खाक झाल्याने घरांची राखरांगोळी झाली आहे .
वाडेगाव-बाळापूर रस्त्यावर असलेल्या पांडुरंग घाटोळ यांच्या मालकीच्या जागेमध्ये विठ्ठल खंडुजी जाधव हे कुटुंब भाड्याने राहात होते. त्यांच्या घराला बुधवारी सकाळी अचानक आग लागली. या आगीमध्ये शेतमजूर जाधव कुटुंबांनी शेतामध्ये राबराब राबून पेटीत गोळा करुन ठेवलेले नगदी एक लाख रुपये तसेच दीड लाख रुपये किंमतीचे सोने-चांदीचे दागिने, कुलर, टीव्ही, आदी घरातील संसारोपयोगी साहित्य जळून खाक झाल्याने त्यांचे अंदाजे ३ लाख रुपयांचे नुकसान झाले आहे.
दिपाली विठ्ठल जाधव ही ३५ वर्षीय महिला आपल्या १० वर्षाच्या मुलाचा सांभाळ करीत होती. या आगीमध्ये सदर महिला होरपळल्याने तिला उपचारार्थ अकोला येथील खाजगी दवाखान्यात भरती करण्यात आले आहे.
सुदैवाने घरातील गॅसच्या टाकीने पेट घेतला नाही. त्यामुळे पुढील अनर्थ टळला. शेजारील नागरिकांनी धावत येऊन तसेच टँकरच्या साहाय्याने पाणी मारून आग आटोक्यात आणली. या आगीत झालेल्या नुकसानीचा पंचनामा करुन शासनाने या कुटुंबाला तातडीने मदत करण्याची मागणी करण्यात येत आहे.