कारच्या चाकाखाली आल्याने दीड वर्षीय बालिकेचा मृत्यू झाल्याची घटना पनवेल तालुक्यातील कुंडेवहाळ येथे मंगळवारी दुपारी घडली. पनवेल शहर पोलिसांनी या अपघाताला जबाबदार असलेल्या कार चालकाविरोधात गुन्हा दाखल करून त्याला ताब्यात घेतले आहे. या मृत बालिकेचे नाव प्रिन्सी पाटील असे आहे.
ही मुलगी कुंडेवहाळ गावात आईवडिलांसह राहात होती. मंगळवारी दुपारी १२ वाजण्याच्या सुमारास घराशेजारी असलेल्या वाहन पार्किंगमध्ये खेळण्यासाठी ती गेली होती. यावेळी तेथे राहाणाऱ्या जगदीश करावकर यांनी कार सुरू केली व ते निघाले. त्यामुळे प्रिन्सी ही कारच्या पुढील चाकाखाली आली. तिच्या ओरडण्याचा आवाज आल्यानंतर त्यांनी कार थांबवली. आजुबाजूच्या नागरिकांनी त्या ठिकाणी धाव घेतली. गंभीर जखमी असलेल्या प्रिन्सीला तत्काळ मोहिते हॉस्पीटल येथे नेण्यात आले. मात्र तेथील डॉक्टरांनी तिला मृत घोषित केले. या घटनेनंतर पनवेल शहर पोलिसांनी करावकर यांच्याविरोधात गुन्हा दाखल करून त्यांना ताब्यात घेतले.