गोव्याचे मुख्यमंत्री लक्ष्मीकांत पारसेकर यांच्या मेव्हण्याला लाचलुचपत प्रतिबंधक विभागाने लाच घेताना रंगेहाथ पकडले. दिलीप मालवणकर असे त्याचे नाव असून, त्याच्यावर गुन्हा नोंदवण्यात आला आहे.
गोवा राज्य औद्योगिक विकास निगमच्या (GIDC) विभागीय अधिकाऱ्यासह मुख्यमंत्री पारसेकर यांचा सरकारी अधिकारी असलेला मेव्हणा मालवणकर याला एक लाख रुपयांची लाच स्वीकारताना एसीबीने पकडले आहे, अशी माहिती पोलिस अधिकारी जॉन अगुईयार यांनी दिली.
‘तुएम औद्योगिक इस्टेट’मधील एका प्लॉटच्या भूसंपादनात मदत करू, असे सांगून मालवणकर याने उद्योजक संजय कुमावत यांच्याकडे लाचेची मागणी केली होती. मालवणकरसह ‘जीआयडिसी’शी संबंधित अजित गौनेकर या अधिकाऱ्यालाही अटक करण्यात आली आहे, असे अगुईयार यांनी सांगितले. मालवणकर हा माझा जवळचा नातेवाइक आहे, मात्र या प्रकरणाच्या चौकशीत हस्तक्षेप करणार नाही. माझे कित्येक नातेवाइक आहेत. ते काय करतात, याकडे मी लक्ष देत नाही, असे मुख्यमंत्री पासरेकर यांनी स्पष्ट केले.
आयुर्वेदीक औषधे उत्पादन करणाऱ्या कंपनीसाठी २०१२ मध्ये ‘तुएम औद्योगिक इस्टेट’मधील प्लॉट जयपूरचे उद्योजक संजय कुमावत यांना देण्यात आला होता. या जमिनीचे अधिकार देण्यात मालवणकर आणि गौनेकर हे दोघेही अडथळे निर्माण करत होते, असा आरोप कुमावत यांनी केला आहे. पोलिसांनी या दोघांविरोधात भ्रष्टाचारविरोधी कायद्यांतर्गत गुन्हा दाखल केला आहे.