‘प्रेमात आणि युद्धात सर्व काही माफ असतं’, असं म्हटलं जातं. पण इथं कोणतंही युद्ध सुरू नव्हतं, तर प्रेमाचा वर्षाव होत होता. उत्तर प्रदेशातील बिजनौरच्या एका शाळेत हा अजब आणि म्हणाल तर, संतापजनक ‘किस्सा’ घडला. शाळेच्या हेडमास्तरांनी प्रेयसीसोबत रोमान्स करण्यासाठी शाळा चक्क तीन तास आधीच सोडली. मुले घरी पोहचल्यानंतर त्यांच्या पालकांना आश्चर्याचा धक्काच बसला. मुलांना आज लवकर का सोडले, या प्रश्नाने त्यांना बुचकळ्यातच टाकले.
‘प्रेम आंधळं असतं’ असं म्हटलं जातं ते खरंच आहे. त्याचं झालं असं की, बिजनौर येथील शाळेच्या तरुण प्राचार्याचं दुसऱ्या एका शाळेच्या महिला प्राचार्यावर प्रेम होतं. त्यांनी एकांतासाठी शाळेचं ठिकाण निवडलं. त्यासाठी या तरुण हेडमास्तराने तीन तास आधीच शाळा सोडली. शाळा लवकर सुटल्याने मुले आनंदाने घरी पोहोचली मात्र, त्यांच्या पालकांना आश्चर्य वाटले. आज कसली सुट्टी? या प्रश्नाने त्यांना घेरले. या प्रश्नाचं उत्तर त्यांना हवं होतं आणि ते शोधण्यासाठी त्यांनी शाळेकडे धाव घेतली. शाळेत पोहोचल्यानंतर समोरचं दृष्य पाहिलं आणि पालकांचा पाराच चढला. शाळेचे हेडमास्तर आणि दुसऱ्या शाळेत मुख्याध्यापिका असलेली त्याची प्रेयसी आक्षेपार्ह स्थितीत दिसली. दोघांनी वर्गाच्या दरवाजाची आतून कडी लावली होती. त्यांच्या या ‘लीलां’मुळे संतप्त झालेल्या पालकांनी पोलिसांना बोलावले. पोलिसांनी शाळा गाठली आणि रोमान्स करणाऱ्या या दोघांना पोलिस ठाण्यात घेऊन गेले. या दोघांवर सार्वजनिक ठिकाणी आक्षेपार्ह कृत्य केल्याबद्दल गुन्हा दाखल केला आहे.
या दोघांना न्यायालयासमोर हजर केले असता त्यांची जामिनावर सुटका करण्यात आली. या दोघांना गावकऱ्यांनी आक्षेपार्ह स्थितीत पाहिले होते, असे विभागीय अधिकारी आर. आर. कठेरिया यांनी सांगितले. या दोघांनी केलेला प्रकार गंभीर आहे, असे शाळा व्यवस्थापनाचे राजेश श्रीवास्तव यांनी म्हटले आहे. मात्र दोघांनीही हा आरोप फेटाळून लावला आहे. या आरोपात काहीही तथ्य नाही. ही महिला शाळेत आली होती पण गावकऱ्यांनीच याबाबत उलटसुलट सांगितले, असे या हे़डमास्तराने सांगितले.