ठाकुर्ली येथील मातृकृपा इमारत दुर्घटनेत जखमी व मृत झालेल्यांच्या कुटुंबीयांच्या मदतीसाठी मंगळवारी प्रशांत दामले फॅन फाऊंडेशन निर्मित ‘कार्टी काळजात घुसली’ या नाटकाचा प्रयोग लावण्यात आला. कोकण युवा प्रतिष्ठान या संस्थेने हा प्रयोग आयोजित केला होता. प्रयोगानंतर सुमारे २५ हजार रुपयांचा चेक दुर्घटनाग्रस्तांना देण्यात आले. तसे मेसेज सर्वत्र फॉरवर्ड करून निर्माते प्रशांत दामले यांनी स्वतःची पाठ थोपटून घेतली. या प्रयोगाची तब्बल १ लाख ६० हजारांची तिकिटे विकली गेली होती. असे असूनही मदत केवळ २५ हजारांची झाल्याने दामले यांच्या हेतूबद्दलच शंका घेतली जात आहे. अधिक माहितीअंती ‘ही’ मदतही स्वतः निर्मात्याने केली नसून, आयोजकांनीच पदरमोड करून ही रक्कम दिल्याचे कळते.
‘२२ कुटुंब, ७५ रहिवाशी, ११ जखमी, ९ मृत…ठाकुर्ली मातृकृपा इमारत दुर्घटनाग्रस्तांच्या मदतीसाठी…’ अशा मथळ्याखाली सावित्रीबाई फुले नाट्यगृहात होणाऱ्या ‘कार्टी…’ची जाहिरात करण्यात आली. सर्वसाधारणपणे कोणीही निर्माता अशी मदत करतो त्यावेळी थिएटर भाडे व रंगमंच कामगारांचा भत्ता वगळता कोणीही कलाकार मानधन घेत नाही. हा प्रयोग ‘कोकण युवा प्रतिष्ठान’ने मुद्दाम मदतीसाठी मागून घेतला होता. याबाबत बोलताना प्रतिष्ठानचे अध्यक्ष धनंजय चाळके म्हणाले, ‘या प्रयोगासाठी एकूण १ लाख ६० हजारांचे बुकिंग झाले. दुर्घटनाग्रस्तांना केलेली मदतही आमच्या मंडळानेच केली आहे. ‘कार्टी..’चा प्रयोग मागितल्यावर आम्हाला जो आकडा सांगण्यात आला तो आम्ही दिला. त्यानंतर आम्ही २५ हजारांचीच मदत करू शकलो.’
नाट्यगृहातील सुत्रांनी दिलेल्या माहितीनुसार ‘प्रशांत दामले फॅन फाऊंडेशन’ने कोकण विकास प्रतिष्ठानला हा प्रयोग तब्बल एक लाख ७० हजारांना दिला. त्यामुळे आयोजक १० हजार रु.ने तोट्यात होते. असे असूनही पदरमोड करून २५ हजारांची मदत केली गेली. हा चेक सुपूर्द करताना मात्र तो प्रशांत दामले यांच्या हस्ते देण्यात आला. हा प्रयोग मदतीसाठी आहे हे ठाऊक असूनही निर्मात्याने प्रयोग देताना ‘एक पै’ही कमी न केल्याने नाट्यवर्तुळात आश्चर्य व्यक्त केले जात आहे.
निर्मात्यांनी नाटकाचे कमाल दर किती ठेवावेत याबाबत निर्माता संघाच्या कार्यकारिणीने काही नियम घालून दिले आहेत. या नियमानुसार हे दर ३०० रुपयांच्या वर असू नये असे एकमताने ठरवण्यात आले. असे असूनही डोंबिवली येथे झालेल्या या प्रयोगाला कमाल तिकीट दर ४०० रु. होता. दुर्घटनाग्रस्तांच्या मदतीसाठीचा ‘विशेष शो’ म्हणून जर हे दर लावण्यात आले असतील तर दामले फॅन फाऊंडेशनने जमलेली सर्व रक्कम दुर्घटनाग्रस्तांना का दिली नाही, असा सवालही अनेक निर्माते विचारू लागले आहेत.
‘समाजाचे देणे’ या मथळ्याअंतर्गत ‘कार्टी..’च्या प्रयोगातून फूल ना फुलाची पाकळी म्हणून २५ हजार रुपयांचा चेक कसा दुर्घटनाग्रस्तांना देण्यात आला, या अर्थाचे मेसेज दामले यांनी फिरवले. या मदतीसाठी झटणाऱ्या कोकण युवा प्रतिष्ठानचा उल्लेख तर या मेसेजमध्ये टाळण्यात आलाच, शिवाय त्यातच पुढच्या प्रयोगाचे मार्केटिंग करण्यातच त्यांनी धन्यता मानली.