मिरा रोड पोलिस ठाण्यात नाईक पदावर कार्यरत असलेल्या कर्मचाऱ्याचा सरकारी पोशाख त्याच्या मैत्रिणीने परिधान करून टिक टॉकवर व्हिडीओ केल्याप्रकरणी मिरा रोड पोलिसांनी गुन्हा दाखल केला आहे.
देशात करोनाचा रुग्णांचा आकडा दिवसेंदिवस वाढत असल्याने नागरिकांना घराबाहेर पडण्यास मनाई करण्यात आली आहे. करोनावर नियंत्रण मिळवण्यासाठी पोलिस प्रशासन दिवस-रात्र सेवा देत आहेत, मात्र मागील काही दिवसांत काही कर्मचाऱ्यांमुळे पोलिस खात्याची प्रतिमा मलीन होत असल्याचे घटना दिसून आल्या आहेत. मिरा रोड पोलिस ठाण्यात नाईक पदावर कार्यरत असलेल्या कर्मचाऱ्याचा सरकारी पोशाख त्यांच्या मैत्रिणीने परिधान करून गाणे गात टिक टॉकवर व्हिडीओ टाकून सोशल मीडियावर पसरवल्याची बाब समोर आली. पोलिस अधीक्षकांनी त्याची गंभीर दाखल घेत त्याच्या चौकशीचे आदेश मिरा रोड पोलिसांना दिले आहेत. या प्रकरणी संबंधित महिलेवर गुन्हा दाखल केला आहे. पुढील तपास सुरू असल्याची माहिती मिरा रोड पोलिस ठाण्याचे वरीष्ठ निरीक्षक संदीप कदम यांनी दिली.