ठाणे शहरातील दोन ज्येष्ठ नगरसेवकांसह गेल्या २४ तासांत १५६ नव्या रुग्णांची भर पडली असून एकूण करोनाबाधितांची संख्या २४५० झाली आहे, तर तिघांचा मृत्यू झाल्याने एकूण करोनामृतांचा आकडा ७२वर पोहोचला आहे. नवी मुंबईत बुधवारी ७९ नवे करोनाबाधित आढळले असून रुग्णांची एकूण संख्या १८५३ झाली आहे. ठाणे जिल्ह्यातील एकूण करोनाबाधितांची संख्या ६६९० झाली आहे. तर एकूण करोनामृत्यूंची संख्या २०१ झाली आहे.
ठाण्यामध्ये मुंब्र्यापाठोपाठ आता कळवा व उथळसर प्रभागात ३१ मेपर्यंत कठोर निर्बंध लागू करण्यात आले. कल्याण डोंबिवली क्षेत्रात ५७ नवे रुग्ण सापडल्याने पालिका क्षेत्रातील रुग्णसंख्या ८८२ वर पोहोचली आहे. तर सहा जणांना घरी सोडण्यात आल्याने बरे झालेल्या रुग्णाची संख्या २८६वर पोचली आहे. मागील २४ तासांत तीन करोनाबाधित महिलांचा मृत्यू झाल्याने करोनाबळींची संख्या २६वर पोचली आहे.
उल्हासनगरमध्ये बुधवारी प्रथमच एका दिवसात ३२ करोनाबाधित आढळले असून येथील एकूण रुग्णांची संख्या २४६ झाली आहे. बदलापुरात बुधवारी १३ नवीन रुग्ण आढळले असून एकूण बाधितांची संख्या १९२वर गेली आहे. तर अंबरनाथमध्ये सात नव्या रुग्णांसह एकूण बाधितांची संख्या ८५ झाली आहे.
मिराभाईंदर महापालिकेतील एकूण करोनाबाधितांची संख्या ५७७ झाली असून तेथे आजवर १८ जणांचा मृत्यू झाला आहे.