शहरात करोनाबाधित रुग्णांच्या संख्येत १७ने वाढ झाल्याने एकूण रुग्णांचा आकडा २२६ इतका झाला आहे. आतापर्यंत २९ रुग्ण पूर्णपणे बरे झाले असून सध्या १८५ रुग्णांवर उपचार सुरू आहेत. शनिवारपर्यंत रुग्णांची संख्या २०९ इतकी होती, मात्र ही संख्या कमी होत नसून रविवारी नव्याने वाढ झालेल्या रुग्णांमध्ये नऊ पुरुष आणि आठ महिलांचा समावेश आहे. या रुग्णांमध्ये काही तरुणही आहे. तर वागळे इस्टेटमध्ये पाच नवीन रुग्ण आढळून आल्याने सर्वांची चिंता वाढली आहे. रविवारी चार जणांना घरी सोडण्यात आले.
भिवंडीत नव्याने दोन रुग्ण आढळले
भिवंडीत हळूहळू करोना रुग्णांच्या संख्येत वाढ होऊ लागली आहे. रविवारी दोन रुग्ण वाढल्याने भिवंडीतील रुग्णांचा आकडा नऊवरून ११वर पोहोचला आहे. दरम्यान, भिवंडी शहरात रविवारपासून महापालिकेतर्फे सर्वेक्षण सुरू करण्यात येत आहे. यामध्ये घरातील ६० वर्षांवरील व्यक्तींना दमा, डायबिटिस, किडनीचे आजार, कॅन्सर, रक्तदाब आदीचा त्रास असल्यास याबाबतची माहिती सर्वेक्षण करणाऱ्या पालिका कर्मचाऱ्यास देण्याचे आवाहन पालिका प्रशासनाने केले आहे.