जम्मू आणि काश्मीरमध्ये सुरक्षा दल आणि दहशतवाद्यांमध्ये झालेल्या चकमकीदरम्यान ४ दहशतवाद्यांना कंठस्नान घालण्यात भारतीय जवानांना यश आले आहे. भारतीय लष्कराच्या मेलाहुरा मोहिमेअंतर्गत दहशतवाद्यांचा शोध सुरूच आहे.
या चकमकीबाबत मिळालेल्या माहितीनुसार, भारतीय जवान आणि दहशतवाद्यांमध्ये हे चकमक शोपियांमधील जैनापोरा गावात मंगळवारी रात्री उशिरा सुरू झाली. मेलहोरा भागामध्ये काही दहशतवादी लपून बसले असल्याची माहिती भारतीय लष्कराला मिळाली. त्यानंतर लष्कराने त्या परिसराला घेरून दहशतवाद्यांचा शोध सुरू केला. या मोहिमेत जम्मू आणि काश्मीर पोलिस, ५५ राष्ट्रीय रायफल्स आणि सीआरपीएफच्या संयुक्त पथकाचा समावेश होता.
ही शोधमोहीम सुरू असताना दहशतवाद्यांनी सुरक्षा दलावर गोळीबार करणे सुरू केले. त्यानंतर चकमक सुरू झाली. पहाटे जवानांनी दोन दहशतवाद्यांना कंठस्नान घातले, त्यानंतर काही वेळाने आणखी दोन दहशतवाद्यांना टिपण्यात जवानांना यश आले.