कोविड १९ केअर सेंटर’ म्हणून जाहीर करण्यात आलेल्या मुंबई सेंट्रल येथील बेलासिस रोडवरील रिपन पॅलेस हॉटेलमध्ये आज आगीचा भडका उडाला. या आगीत कोणतीही जीवितहानी झालेली नसून हॉटेलमध्ये क्वारंटाइन ठेवण्यात आलेल्या २४ रुग्णांना सुखरूपपणे अन्यत्र हलवण्यात आले आहे
अग्निशमन दलाने दिलेल्या माहितीनुसार सायंकाळी ५ वाजून ३९ मिनिटांनी आगीबाबत कॉल प्राप्त झाला. त्यानंतर तातडीने अग्निशमन जवानांनी घटनास्थळी धाव घेतली. चार फायर इंजिन व दोन वॉटर टँकरसह हे जवान दाखल झाले. सर्वप्रथम या हॉटेलमध्ये क्वारंटाइन करण्यात आलेल्या २५ रुग्णांना बाहेर काढण्यात आले व त्यानंतर आग आटोक्यात आणण्याचे काम सुरू करण्यात आले.
लॉजिंग रूममध्ये सुरुवातीला आग लागली व नंतर भडकली. तळमजला अधिक तीन मजले अशी ही इमारत असून संपूर्ण इमारतीत धूर पसरला होता, असे अधिकाऱ्यांनी सांगितले. हॉटेलमध्ये ठेवण्यात आलेल्या सर्व रुग्णांना सुखरूपपणे बाहेर काढून सुरक्षितस्थळी हलवण्यात आले आहे. इमारतीत कुणी राहिलं तर नाही ना, याचीही खात्री करण्यात आली आहे, असे मुंबई अग्निशमन दलाचे प्रमुख पी. एस. रहांगळे यांनी सांगितले.
दरम्यान, शर्थीच्या प्रयत्नांनंतर ही आग आटोक्यात आणण्यात यश आले असून अग्नशमन दलाकडून कूलिंग प्रक्रिया सुरू असल्याचे सांगण्यात आले.