राज्य सरकारच्या निर्देशानुसार कर्मचाऱ्यांना त्यांच्या पदानुसार वेतन आदा केले. मात्र एप्रिल महिना संपत आलेला असताना उर्वरित रकमेसाठी महापालिका कर्मचारी प्रतीक्षा करत आहेत. चतुर्थश्रेणी कर्मचाऱ्यांना संपूर्ण वेतन मिळाले असले, तरी उर्वरित अधिकारी अद्याप वेतनाच्या प्रतीक्षेत आहेत. करोना विषाणुचा प्रादुर्भाव वाढल्यानंतर सरकारी कर्मचाऱ्यांना दोन टप्प्यात वेतन देण्याचा निर्णय घेतला. निर्णयाची अंमलबजावणी महापालिका प्रशासनाने केली. तरीही चतुर्थश्रेणी कर्मचाऱ्यांची संख्या जास्त असल्याने एकूण रकमेवर परिणाम झाला नाही. मात्र उर्वरित ५५० कर्मचाऱ्यांना १० एप्रिल रोजी सरकारच्या निर्देशानुसार पहिला पगार मिळाला. त्यानंतर उर्वरित पगाराबाबत अद्याप कोणताही निर्णय झालेला नाही. मार्च महिन्याच्या दुसऱ्या आठवड्यापासून वसुलीचे प्रमाण अत्यंत नगण्य असल्याने राहिलेल्या कर्मचाऱ्यांचे वेतन कसे अदा करायचे, असा प्रश्न निर्माण होणार आहे.