भारतात करोना व्हायरसचा संसर्ग फैलावत चालल्याचं दिसतंय. याच करोना व्हायरसचा आता जम्मू-काश्मीरमध्येही शिरकाव झाल्याचं समोर येतंय. जम्मूमध्ये दोन जण करोना व्हायरसचा संसर्ग झाल्याचं समजतंय. यामुळे करोना बाधितांच्या संख्येत वाढ होण्याची शक्यता आहे. प्रशासनानं तातडीनं खबरदारी घेत जम्मू आणि सांबाच्या सर्व प्राथमिक शाळांना ३१ मार्चपर्यंत सुट्टी घोषित केलीय.
जम्मूमध्ये दोन संशयित रुग्णांची चाचणी करण्यात आली होती. हे दोघेही करोना पॉझिटिव्ह असल्याची शक्यता वाढलीय. दोघांना वेगवेगळ्या ठिकाणी ठेवण्यात आलंय. तिथंच त्यांच्यावर उपचारही सुरू आहेत. दोघांचीही प्रकृती स्थिर असल्याचं समजतंय. दोघेही प्राथमिक उपचारानंतर रुग्णालयातून निघून गेले होते परंतु आता त्यांना परत बोलावण्यात आलंय.जम्मू-काश्मीरचे प्रमुख सचिव (योजना) रोहित कंसल यांनी दिलेल्या माहितीनुसार, जम्मू आणि सांबा जिल्ह्यातील प्राथमिक शाळांना ३१ मार्चपर्यंत तत्काल बंद करण्याचे आदेश देण्यात आलेत. तसंच ३१ मार्चपर्यंत जम्मू-काश्मीरचे सर्व बायोमेट्रिक अटेन्डंटसवरही बंदी घालण्यात आलीय. दरम्यान, करोनाच्या पार्श्वभूमीवर नागरिकांनी गर्दीची ठिकाणं, सभा किंवा संमेलनं टाळावीत, असा सल्ला केंद्र सरकारकडून देण्यात आलाय. भारतात असा सल्ला केंद्र सरकारनं दिलाय. भारतात आत्तापर्यंत ३१ करोनाबाधित रुग्ण आढळलेत परंतु, सुदैवानं भारतात अद्याप एकही मृत्यू करोनामुळे झालेला नाही. जगभरात मात्र करोनाच्या बळींची संख्या ३४११ वर पोहचलीय.