कुडित्रे (ता. करवीर) येथील सौरभ सुभाष पाटील (वय २४) या युवकाचा मुत्रपिंड निकामी झाल्याने मृत्यू झाला. दरम्यान, सौरभला मोबाइलवर पब्जी खेळण्याचे वेड असल्याने मुत्रपिंडावर ताण येऊन ती निकामी झाल्याने त्याचा मृत्यू झाल्याची चर्चा परिसरात सुरू आहे.
सौरभचे आई वडील शेतकरी असून दहावीनंतर त्याने शाळा सोडली होती. शेतीकामातून वेळ मिळाल्यावर तो मोबाइलवर गेम खेळत बसायचा. तीन महिन्यांपूर्वी त्याने पब्जी गेम मोबाइलवर डाऊनलोड केल्यावर तो तासनतास हा गेम खेळायचा. त्याला जेवणाचेही भान नसायचे. रात्री उशिरापर्यंत तो मोबाइलवर गेम खेळत असायचा. पब्जी खेळण्याच्या नादात मूत्रविसर्जनाकडे त्याचे दुर्लक्ष झाले. आठ दिवसांपूर्वी त्याचे मूत्र विसर्जन बंद झाल्यानंतर नातेवाईकांनी त्याला कोल्हापुरात खासगी हॉस्पिटलमध्ये उपचारासाठी दाखल केले. वैद्यकीय तपासणीत त्याची मूत्रपिंडे निकामी झाल्याचे डॉक्टरांनी सांगितले. त्याच्यावर उपचार सुरू असताना मंगळवारी त्याचा मृत्यू झाला. पण गावामध्ये पब्जी खेळत असल्याने त्याची मुत्रपिंडे निकामी झाल्याची चर्चा सुरू होती.