‘करोना’ विषाणूचा संसर्ग होऊन रुग्ण पॉझिटिव्ह आढळल्यास त्याला तातडीने उपचार देण्यासाठी ससून रुग्णालयात आठ बेडचा स्वतंत्र कक्ष तयार करण्यात आला आहे. या कक्षामध्ये व्हेंटिलेटर उपलब्ध करण्यात आला असून, डॉक्टरांसह कर्मचाऱ्यांचाही समावेश करण्यात आला आहे. डॉक्टरांसह नर्सनाही प्रशिक्षण देण्यात आले आहे.
करोना विषाणूच्या संसर्गामुळे सर्दी, ताप, खोकला अशी लक्षणे आढळलेल्या रुग्णांना पुणे महापालिकेच्या नायडू रुग्णालयात स्वतंत्र कक्षात ठेवण्यात येत आहे. त्यांच्या घशातील द्रव राष्ट्रीय विषाणू संस्थेकडे (एनआयव्ही) चाचणीसाठी पाठविण्यात येतो. ‘ससून रुग्णालयात वॉर्ड क्रमांक ४०च्या शेजारील कक्षात तातडीचा वैद्यकीय विभाग होता. काही महिन्यांपूर्वी तो कक्ष दुसऱ्या ठिकाणी हलविण्यात आला आहे. त्यामुळे रिकाम्या झालेल्या कक्षात नवीन आठ बेड तयार करण्यात आले आहेत. करोनाचा संशयित रुग्ण राज्यात आढळून आला, त्याचवेळी राज्याच्या आरोग्य विभागाने पालिका, जिल्हा रुग्णालये आणि वैद्यकीय महाविद्यालयांच्या रुग्णालयात स्वतंत्र कक्ष तयार करण्याचे आदेश देण्यात दिले होते. या कक्षातील डॉक्टर, नर्स आणि कर्मचाऱ्यांना प्रशिक्षण देण्यात आले आहे. तसेच त्यांना उपचारांचे कीट, हातमोजे, एन ९५ मास्कही देण्यात आले आहेत. या कक्षांमध्ये मेडिसिन, बालरोग, भूलतज्ज्ञ आदी विभागातील डॉक्टरांचा समावेश आहे, अशी माहिती उपअधिष्ठाता डॉ. मुरलीधर तांबे यांनी दिली