मोबाइल फोन लुटण्याच्या प्रयत्नात क्लिनरवर धारधार ब्लेडने हल्ला करून फरार झालेल्या त्रिकुटाला एपीएमसी पोलिसांनी अवघ्या काही तासांत जेरबंद केले आहे. बंटी फकिरा राठोड (२६), ओमप्रकाश मुरली चौहान (२७) आणि पुनीत सुरेंद्रप्रसाद मिश्रा (२२) अशी या त्रिकुटाची नावे असून एपीएमसी पोलिसांनी या तिघांना जबरी चोरीच्या गुन्ह्याखाली अटक केली आहे. क्लीनर रणजीतकुमार श्रीरामसेवक सहानी (२६) याच्यावर मुंबईतील जे. जे. रुग्णालयात उपचार सुरू आहेत.
बोरिवली येथे राहणारा श्रीरामसेवक मंगळवारी रात्री उशिरा ट्रक चालक सद्दाम हुसेन याच्यासोबत मालवाहू ट्रकसोबत आला होता. रात्री उशीर झाल्याने या दोघांनी ताब्यातील ट्रक मॅफको मार्केटमधील सप्तश्रुंगी कंपनीसमोर रस्त्यालगत पार्क करून त्यात दोघेही झोपी गेले. पहाटे चारच्या सुमारास बंटी राठोड, ओमप्रकाश चौहान आणि पुनित मिश्रा हे तिघे त्याठिकाणी आले. यावेळी त्यांनी क्लीनर श्रीरामसेवक झोपलेल्या ट्रकच्या खिडकीची काच फोडून त्याचा मोबाइल चोरून पळण्याचा प्रयत्न केला. मात्र याचवेळी श्रीरामसेवकला जाग आल्याने त्याने एका चोराला पकडून ठेवले. त्यामुळे दुसऱ्या चोराने सहकाऱ्याची सुटका करण्यासाठी श्रीरामसेवकला मारहाण केली. मात्र श्रीरामसेवकने चोराला न सोडल्याने तिसऱ्या चोराने श्रीरामसेवकच्या चेहऱ्यावर, गालावर व हातावर धारधार ब्लेडने वार केले आणि तेथून पलायन केले. श्रीरामसेवकला सुरुवातीला वाशीतील महापालिकेच्या रुग्णालयात दाखल करण्यात आले होते, त्यानंतर पुढील उपचारासाठी त्याला मुंबईतील जे. जे. रुग्णालयात दाखल करण्यात आले. त्यानंतर एपीएमसी पोलिसांनी अज्ञात त्रिकुटावर गुन्हा दाखल केला. त्यानंतर गुन्हे प्रकटीकरण पथकातील सहाय्यक पोलिस निरीक्षक भूषण पवार, पोलिस हवालदार अशोक खैरे व पोलिस शिपाई सचिन ठोंबरे यांनी परिसरातील सीसीटीव्ही फुटेजची तपासणी करून गुन्हेगारांची माहिती मिळविली. त्यानंतर तिघांना वेगवेगळ्या ठिकाणांवरून अटक करण्यात आली.