अमिताभ बच्चन यांच्या ‘दिवार’ या चित्रपटात पोलीस निरीक्षक असलेला शशी कपूर हत्यार नसतानाही आपल्याकडे हत्यार असल्याचे भासवून स्मगलरच्या
टोळीला पकल्याचे दाखवले आहे. पाटण्यात पोलिसाने नव्हे, तर एका दरोडेखोराने बँक लुटण्यासाठी तशाच कल्पनेचा वापर केल्याचे उघड झाली आहे. बंदुकीचा धाक दाखवून दरोडेखोराने एका बँकेतून ९ लाख रुपयांची रोकड लंपास केली. विशेष म्हणजे या दरोडेखोराकडे कोणतेही हत्यार नसल्याचे नंतर स्पष्ट झाले आहे.
कोतवाली पोलीस ठाण्याच्या हद्दीत असलेल्या वीना चित्रपटगृहाजवळ असलेल्या यूनायटेड बँक ऑफ इंडियाच्या शाखेत ही घटना घडल्याचे वरिष्ठ पोलीस निरीक्षक गरिमा मलिक यांनी सांगितले. या दरोडेखोराने दुपारच्या वेळेस या बँकेच्या शाखेत प्रवेश केला. त्यानंतर त्याने बँकेचे अधिकारी आणि कर्मचाऱ्यांना धमकावणे सुरू केले आणि ९ लाखांची रोकड लुटली.
दरोड्याची ही घटना बँकेच्या सीसीटीव्ही फुटेजमध्ये कैद झाली आहे. हा दरोडेखोर दोन्ही हातांनी पिशवीत कॅश भरताना दिसतो आहे. त्याच्याकडे ना पिस्तूल होते ना इतर कोणत्याही प्रकारचे हत्यार. केवळ तो हत्यार असल्याचा देखावा करत होता, हे सीसीटीव्ही फुटेजवरून लक्षात येतं. सीसीटीव्ही फूटेजनुसार, हा दरोडेखोर दुपारी ३ वाजून ४ मिनिटांनी बँकेत प्रवेश केला. बँक लुटून तो ३ वाजून ६ मिनिटांनी पसार झाला. याचाच अर्थ या दरोडेखोराने केवळ २ मिनिटांमध्ये ही बँक लुटली.
सुरक्षा रक्षक होता गायब
विशेष म्हणजे ज्या वेळी बँकेत दरोडा पडला, त्या वेळी बँकेत सुरक्षा रक्षक उपस्थित नव्हते. याचा पोलीस तपास करत आहेत. या दरोड्यात बँकेच्या कर्मचाऱ्यांचा हात आहे का, या दिशेनेही पोलीस तपास करत आहेत. मात्र, ही घटना इतक्या जलद गतीने झाली की, कुणाला कसलाच विचार करण्यास वेळ मिळाला नाही, अशी माहिती शाखेचे मॅनेजर अमित पालीवाल यांनी दिली. दरोड्यावेळी अलार्मही वाजला नाही, असे त्यांनी सांगितले.
तासाभरापूर्वीच बँकेतून ५४ लाख रुपये ट्रान्स्फर केले गेले होते
दरोडा पडण्यापूर्वी बँकेतून ५४ लाख रुपये ट्रान्स्फर करण्यात आले होते, अशी माहिती यूनियन बँक ऑफ इंडियाचे मुख्य व्यवस्थापक पी. के. मिश्र यांनी सांगितले. दरोड्याच्या वेळी काउंटरवर १० लाख ७४ हजार रुपये होते. त्यांपैकी ९ लाख १२ हजार रुपये लुटण्यात आले होते.