नव्या वर्षात रोरो सेवा सुरू होणार असून या सेवेच्या जोडीला जलवाहतुकीचा आणखी एक पर्याय उपलब्ध होणार आहे. नव्या वर्षात मुंबई व नवी मुंबईकरांना वॉटर टॅक्सीची भेट मिळणार आहे.
दक्षिण मुंबई ते नवी मुंबई अशी ही सेवा असून जेमतेम ३० मिनिटांत हा प्रवास पूर्ण करता येईल. मुंबई पोर्ट ट्रस्ट ही सेवा सुरू करत आहे. यासाठी सहा एजन्सींनी स्वारस्य दाखवले असून या सहाही एजन्सींना ही सेवा चालवण्याची जबाबदारी देण्यात येईल.
प्रिन्सेस डॉक भाऊचा धक्का येथून नवी मुंबईतील बेलापूर, नेरुळ, वाशी, जवाहरलाल नेहरू पोर्ट ट्रस्ट, करंजा, कान्होजी आंग्रे बेट, रेवस आणि धरमतर या पट्ट्यात सेवा सुरू होईल. त्यामुळे नजिकच्या काळात ही ठिकाणे पर्यटन स्थळे म्हणून नावारूपास येतील. कान्होजी आंग्रे बेट नूतनीकरणास अलीकडेच केंद्र सरकारने हिरवा कंदील दाखवला आहे.
वॉटर टॅक्सीसेवेसाठी बंदर शुल्क संबंधित एजन्सीला द्यावे लागेल. मिळणाऱ्या महसुलात पोर्ट ट्रस्टचा वाटा असेल. वॉटर टॅक्सीचे भाडे या एजन्सी ठरवतील. पोर्ट ट्रस्ट, सिडको व महाराष्ट्र मेरिटाइम बोर्ड वॉटर टॅक्सीची खरेदी करतील.
सध्या दक्षिण मुंबई ते नवी मुंबई प्रवासाला दीड तासाहून जास्त वेळ लागतो. वॉटर टॅक्सीने हा प्रवास अर्ध्या तासात पूर्ण करता येईल. भविष्यात याच मार्गावर हावरक्राफ्ट सेवा सुरू करण्याचा पोर्ट ट्रस्टचा इरादा आहे.
फेब्रुवारीपासून भाऊचा धक्का, मांडवा व नेरुळ या त्रिकोणात रोरो सेवाही सुरू होणार आहे. या सेवेसाठी जानेवारीच्या शेवटच्या आठवड्यात ग्रीसहून जहाज येणार आहे. त्यानंतर फेब्रुवारीच्या पहिल्या आठवड्यापासून रोरो सुरू होईल.
वॉटर टॅक्सी प्रकल्प गेली अनेक वर्षे विचाराधीन होता. परंतु गाडे पुढे सरकत नव्हते. वॉटर टॅक्सी व रोरो या दोन सेवांमुळे पूर्व किनारपट्टीवर सार्वजनिक जलवाहतुकीचा नवा अध्याय सुरू होईल. या जोडीला ठाणे व नवी मुंबई या पट्ट्यातही जलवाहतुकीचा प्रस्ताव आहे. परंतु या प्रस्तावाबाबत अजून ठोस काही घडलेले नाही.
क्रूझ टर्मिनलमुळे फायदा
नव्या वर्षात आंतरराष्ट्रीय क्रूझ टर्मिनल सुरू झाल्यानंतर क्रूझ पर्यटनाला मोठी चालना मिळणार आहे. आंतरदेशीय क्रूझ टर्मिनल सुरू झाल्यापासून मुंबई बंदरात क्रूझचा वावर वाढला आहे.अनेक नव्या क्रूझ कंपन्या पोर्ट ट्रस्टच्या संपर्कात आहेत.