राहुरी तालुक्यातील वावरथ जांभळी येथे सर्पदंश झालेल्या पाच वर्षीय मुलीचा नगर सिव्हिल हॉस्पिटलमध्ये वेळेत उपचार न मिळाल्याने मृत्यू झाला आहे. अक्षरा अनिल राठोड असे मृत्यू झालेल्या मुलीचे नाव आहे.
याबाबत कुटुंबियाकडून मिळालेल्या माहितीनुसार, मध्यरात्री दीड वाजण्याच्या सुमारास सर्पदंश झालेल्या मुलीला तिच्या कुटुंबियांनी उपचारासाठी सिव्हिल रुग्णालयात आणले होते. परंतू, येथील अधिकाऱ्यांनी मुलीस दाखल करून घेण्यास नकार दिला. त्यामुळे नाईलाजाने मुलीच्या कुटुंबीयांनी रात्री शहरातील अनेक खासगी दवाखान्याना विनंती केली. मात्र, त्याचा काही उपयोग झाला नाही. त्यामुळे कुटुंबीय पुन्हा सिव्हिलमध्ये आले. यावेळी मात्र मुलीस दाखल करून उपचार देण्याची तयारी दवाखान्यातील कर्मचाऱ्यांनी दाखवली. पण, तोपर्यंत वेळ निघून गेली होती. रुग्णालयात त्या मुलीला मृत घोषित करण्यात आले. मुलीचे आई-वडील ऊसतोड कामगार आहेत. रोजगारासाठी ते राहुरी तालुक्यातील वावरथ जांभळी येथे आले होते.