अंटार्क्टिकामध्ये जाणारे चिली सैन्याचे विमान सोमवारी कोसळले. या विमानातून प्रवास करणारे ३८ प्रवासी बेपत्ता असून शोधकार्य सुरू आहे.
अंटार्क्टिकाच्या समुद्रात ‘अंटार्क्टिका पेनिन्सुला’ ही क्रूझ होती. चिलीचे विमान कोसळले तेव्हा ही क्रूझ घटनास्थळाजवळच होती. पुण्यातील डॉ. मिलिंद जगताप या क्रूझवर उपस्थित होते. सॅटेलाइटद्वारे त्यांनी घटनास्थळावरून माहिती दिली. हे विमान ड्रेक पॅसेजजवळ कोसळले. दोन समुद्र, महासागर ज्या ठिकाणी एकत्र येतात. त्याला ड्रेक पॅसेज म्हटले जाते. विमान कोसळल्यानंतर क्रूझला ही त्याचा धक्का जाणवला असल्याचे डॉ. जगताप यांनी सांगितले. क्रूझमधील ४-५ जण जेवण करत असताना खुर्चीसोबत उलटे पडले. त्याशिवाय किचनमध्ये असणारी ट्रॉलीदेखील उलटली. क्रूझवर एक सेमिनारदेखील सुरू होते. त्यावेळी अचानकपणे जाणवलेल्या धक्क्यामुळे ४० ते ५० जण सोफा, खुर्चीसह पडले असल्याची माहिती त्यांनी दिली.
विमान कोसळले असल्याची माहिती क्रूझमधील शीप कॅप्टनला मिळाली. बचावकार्यासाठी या अपघाताची माहिती त्यांनी क्रूझवरील कर्मचारी व प्रवाशांनी दिली असल्याची माहिती डॉ. जगताप यांनी दिली. अपघातानंतर तातडीने शीप कॅप्टनला बचाव कार्यात मदत करण्याचे निर्देश प्रशासनाकडून देण्यात आले. त्यामुळे ही क्रूझ तातडीने बचाव कार्यात सहभागी झाली. बचाव कार्य सुरू केल्यानंतर विमानातील एकही प्रवासी आढळला नसल्याची माहिती डॉ. जगताप यांनी दिली.
चिलीचे हरक्युलिस सी१३० हे विमान अंटार्क्टिकामध्ये जात असताना अचानक बेपत्ता झाले होते. या विमानाचा संपर्क तुटला असल्याची माहिती चिली हवाई दलाने दिली होती. आता, प्रत्यक्षदर्शींनी दिलेल्या माहितीनुसार या विमानाला अपघात झाला असल्याचे स्पष्ट झाले आहे.