बदलापूर येथील माणकोली भागात एका प्रवाशाने रिक्षात बसून पुन्हा रिक्षात न जाता पायी जाण्याचा निर्णय घेतल्याने रिक्षाथांब्यावरील चालकाने प्रवाशाच्या पत्नीसह प्रवाशाला मारहाण केली आहे. या मारहाणीत रिक्षाचालकाने प्रवाशाच्या हाताला चावाही घेत जखमी केले आहे. या प्रकरणी बदलापूर पूर्व पोलिस ठाण्यामध्ये रिक्षाचालकाविरोधात गुन्हा दाखल करण्यात आला.
बदलापूर पूर्व भागातील माणकोली परिसरात राहणारे प्रताप हे आपल्या पत्नीसह रेल्वे स्थानकाकडे निघाले होते. रिक्षा थांब्यावर रिक्षात बसले. मात्र काही कारणास्तव रिक्षा सुरू होण्यापूर्वीच पत्नीसह पायी जायला लागले. मात्र प्रवासी रिक्षातून उतरल्याचा राग आल्याने त्याने प्रताप यांच्यासोबत वाद घालण्यास सुरुवात करत त्यांना मारहाण केली. या भांडणात रिक्षाचालकाने त्यांना वीट मारत त्यांच्या हाताच्या अंगठ्याला चावाही घेतला. यात प्रताप हे जखमी झाले असून त्यांनी पोलिस ठाण्यामध्ये गुन्हा दाखल केला आहे.