येथील भारतीय स्टेट बँकेच्या मुख्य शाखेसमोरील एटीएम आणि सीडीएममशीन असलेला संपूर्ण गाळा आग लागल्याने जळून खाक झाला आहे. मंगळवारी मध्यरात्री लागलेली ही आग सकाळी मॉर्निंग वॉकला जाणाऱ्या लोकांच्या लक्षात आल्याने तात्काळ अग्निशमन दलाच्या जवानांनी येऊन ही आग आटोक्यात आणली.
नवीन जिल्हा परिषद इमारती पुढे भारतीय स्टेट बँकेची मुख्य शाखा आहे. बाहेरच्या बाजूला एटीएम आणि सिडीयम मशिन असलेला एक गाळा असून त्या ठिकाणी एटीएमच्या तीन व एक सिडीएम मशीन ठेवण्यात आलेली आहे. मंगळवारी रात्री बँकेच्या अधिकाऱ्यांनी या मशीनची पाहणी करून पैसे भरले असल्याचे समजते. मात्र, असे असतानाही मध्यरात्रीच्या सुमारास ही आग लागली. इलेक्ट्रिक वायरिंगमध्ये झालेल्या शॉर्टसर्किटमुळे ही आग भडकली असल्याचे सांगण्यात येते. मात्र, पाहता-पाहता आगीचे लोट एटीएम मशीनच्या दरवाजाबाहेर येऊ लागले आग मोठ्या प्रमाणात लागून एटीएम मशीन तसेच सीडीएम मशीन देखील जळून खाक झाली.
सकाळी या रस्त्याने मॉर्निंग वॉकला जाणाऱ्या लोकांच्या हा प्रकार लक्षात आला. त्यांनी लागलीच बँकेला कळवले. यामुळे बँक अधिकाऱ्यांनी घटनास्थळी येवून अग्निशमन दलाला पाचारण केले. अग्निशमन दलाच्या दोन बंबांच्या साहाय्याने जवानांनी ही आग आटोक्यात आणली. दरम्यान एटीएम मशीनमध्ये किती पैसे होते आणि या आगीत नेमके किती नुकसान झाले याची माहिती बँकेचे अधिकारी घेत आहेत.
फोटो ओळी..
परभणीतील भारतीय स्टेट बँकेच्या मुख्य शाखेसमोरील एटीएम आणि सीडीएममशीन असलेला संपूर्ण गाळा आग लागल्याने जळून खाक झाला.