कांदिवली येथील शताब्दी रुग्णालयात भूलीचे इंजेक्शन दिल्यानंतर प्रमिला देवरे (३२) या महिलेचा शुक्रवारी मृत्यू झाला. मोटारसायकलवरून पडल्याने हाताला झालेल्या अस्थिभंगाची शस्त्रक्रिया करण्यापूर्वी भूलीचे इंजेक्शन चुकीच्या पद्धतीने दिल्याने प्रमिला यांचा मृत्यू झाल्याचा आरोप देवरे कुटुंबीयांनी केला आहे.
चिंचोली फाटक, मालाड येथे राहणाऱ्या प्रमिला या पती मनोज देवरे यांच्यासोबत ९ नोव्हेंबरला रात्री मोटारसायकलवरून घरी परतत होत्या. खड्डा चुकवताना मोटारसायकलचा तोल जात असतानाच प्रमिला यांनी घाबरून गाडीवरून खाली उडी मारली. त्यामुळे त्यांच्या उजव्या हाताला मार लागला. १९ नोव्हेंबर रोजी त्यांना शस्त्रक्रियेसाठी शस्त्रकियागृहात नेण्यात आले. त्यावेळी त्यांना दोनवेळा भूलीचे इंजेक्शन दिल्यामुळेच त्यांचा मृत्यू झाल्याचा आरोप देवरे कुटुंबीयांनी केला आहे.
भूलीचे पहिले इंजेक्शन दिल्यानंतर भूल न चढल्यामुळे संपूर्ण शरीराला भूल देण्यासाठी पुन्हा दिलेल्या इंजेक्शनमुळेच त्यांचा मृत्यू झाल्याचा आरोप करीत या प्रकरणाची कसून चौकशी व्हावी, अशी मागणी प्रमिला यांचा भाचा गणेश गुरव यांनी केली आहे.
१९ नोव्हेंबरला त्यांना शस्त्रक्रियेसाठी शस्त्रकियागृहात नेण्यात आले, मात्र शस्त्रक्रिया न करताच त्यांना थेट अतिदक्षता विभागात दाखल केले. प्रकृती गंभीर झाल्याचे सांगून त्यांना कृत्रिम श्वसनयंत्रणेवर ठेवल्याचे कळविले, असे प्रमिला यांचा पती मनोज देवरे यांनी सांगितले. ‘प्रमिला यांचा मृत्यू नेमका कशामुळे झाला हे सांगू शकत नाही. शवविच्छेदनाच्या अहवालानंतरच ते स्पष्ट होईल’, असे कांदिवली शताब्दी रुग्णालयाचे डॉ. प्रमोद नगरकर यांनी सांगितले.
रुग्णालयाचा दबाव
प्रमिला यांच्या नाका-तोंडातून गुरुवारी रक्त येत होते. तिची प्रकृती योग्य नसल्याचे लक्षात आल्यावर पुन्हापुन्हा यासंदर्भात विचारणा करूनही रुग्णालय प्रशासन मात्र आधी सही करा मग माहिती देतो, असा दबाव आणत असल्याचे देवरे कुटुंबीयांनी सांगितले.