ज्येष्ठ समाजसेवक अण्णा हजारे यांना निनावी पत्राद्वारे हत्येची धमकी देण्यात आली आहे. ‘अरविंद केजरीवाल यांच्याशी संबंध ठेवू नका, नाहीतर तुमचा नरेंद्र दाभोलकर करून टाकू,’ असा इशारा या पत्रातून देण्यात आला आहे. याप्रकरणी नगर जिल्ह्यातील पारनेर पोलीस ठाण्यात गुन्हा दाखल करण्यात आला आहे.
अण्णांना पाठविण्यात आलेले ‘धमकीपत्र’ इंग्रजीत असून त्यावर ७ ऑगस्टची तारीख असल्याची माहिती पोलिसांनी दिली आहे. अखिल भारतीय अंधश्रद्धा निर्मूलन समितीचे नरेंद्र दाभोलकर यांच्या हत्येची आठवणही पत्रातून करून देण्यात आली आहे. ‘अण्णांनी राळेगणसिद्धी या आपल्या गावीच राहावे. आम आदमी पक्षाचे नेते केजरीवाल यांच्याशी फार जवळी वाढवू नये,’ असा इशाराही देण्यात आला आहे.
अरविंद केजरीवाल यांनी राजकीय पक्ष स्थापन केल्यानंतर अण्णा त्यांच्यापासून दुरावले होते. मात्र, अलीकडेच अण्णांनी दिल्लीचे मुख्यमंत्री केजरीवाल व उपमुख्यमंत्री मनीष सिसोदिया यांची भेट घेतली होती. तसेच प्रशांत भूषण आणि योगेंद्र यादव यांच्या निलंबनाबाबत पुनर्विचार करण्यात यावा,’ असा सल्लाही केजरीवालांना दिला होता. त्यानंतर काही दिवसांतच हे पत्र आल्यानं या भेटीशी त्याचा काही संबंध आहे का, या दिशेने चौकशी सुरू असल्याचं सूत्रांकडून समजतं.
केंद्र सरकारच्या प्रस्तावित भूसंपादन कायद्याला विरोध करण्यासाठी अण्णांनी आंदोलनाची हाक दिली असून त्याची सुरुवात करण्यासाठी अण्णा सध्या हरयाणातील रोहतक येथे आहेत. त्यांच्या जिवाला असलेला धोका लक्षात घेऊन आधीपासूनच त्यांना झेड दर्जाची सुरक्षा देण्यात आली आहे. आताच्या धमकीबद्दल महाराष्ट्र पोलिसांनी हरयाणा पोलिसांना आवश्यक त्या सूचना दिल्याचे समजते.