विमाननगर येथील फिनिक्स मॉलच्या एका ज्वेलरी शॉपमध्ये खदेरीच्या बहाण्याने आलेल्या जोडप्याने दीड लाख रुपये किंमतीच्या सोन्याच्या बांगड्या चोरून नेल्याचा प्रकार समोर आला आहे. या प्रकरणी विमाननगर पोलिस ठाण्यात गुन्हा दाखल करण्यात आला आहे.
याबाबत महंमद जरीश (वय ३१, रा. विमाननगर) यांनी तक्रार दिली आहे. त्यानुसार एका जोडप्यावर गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार फिनिक्स मॉलमधील मलबार गोल्ड शॉपचे डायरेक्टर आहेत. त्यांच्या दुकानात सोन्याचे दागिने विक्री केले जातात. त्यासाठी दुकानात सेल्समन आहेत. आठ ऑगस्ट रोजी सायंकाळी एक दाम्पत्य सोन्याचे दागिने खरेदी करण्यासाठी दुकानात आले होते. त्यांच्यासोबत दोन लहान मुलेदेखील होती. जरीश यांनी सेल्समन प्रमोद पावले यांना त्या दाम्पत्यला सोन्याच्या बांगड्या दाखविण्यास सांगितले. त्यानुसार पावले यानी दाम्पत्याला बांगड्या दाखविल्या. काही वेळ बांगड्या पाहिल्यानंतर दाम्पत्य निघून गेले. रात्री सर्व दागिने ठेवत असताना सोन्याच्या डिझाइन असलेल्या बांगड्या गायब असल्याचे दिसून आले. शोधाशोध केली, पण बांगड्या मिळाल्या नाहीत. त्यामुळे ‘सीसीटीव्ही’ची पाहणी केली असता सोन्याच्या बांगड्या दाखविल्यानंतर एक महिला त्या बांगड्या हातात घालून गेल्याचे दिसून आले. दीड लाख रुपयांच्या बांगड्या चोरीला गेल्याप्रकरणी त्यांनी विमानतळ पोलिसांकडे तक्रार दिली. या प्रकरणी विमानतळ पोलिस अधिक तपास करत आहेत.