या प्रकरणी भिंगार कॅम्प पोलिस स्टेशनला बक्षीभाई फकीर शेख (रा. घोसपुरी, नगर) यांच्या फिर्यादीवरून अज्ञात व्यक्तीविरुद्ध फसवणुकीचा गुन्हा नोंदविण्य़ात आला आहे. गुरुवारी सायंकाळी शेख एटीएममध्ये पैसे काढण्यासाठी आले होते. त्यांनी एटीएममध्ये कार्ड टाकल्यानंतर एटीएममधून पैसे निघाले नाहीत. त्यावेळी त्यांच्या पाठीमागे एक व्यक्ती उभी होती. त्या व्यक्तीने एटीएममधून पैसे काढून देतो, असे म्हणून शेख यांच्याकडून त्यांचे एटीएमकार्ड घेतले. त्यानंतर त्या व्यक्तीने कार्डला थुंकी लावून कार्ड़ शर्टला घासून ते पुन्हा एटीएममध्ये टाकले. शेख यांना एटीएमचा पिनही त्या व्यक्तीने विचारून घेतला. पैसे निघत नसल्याचे सांगून ती व्यक्ती निघून गेली. त्यानंतर शेख यांच्या बँकेच्या खात्यातून वेळीवेळी एक लाख ३६ हजार रुपये काढून घेण्यात आले. खात्यातून पैसे गेल्याचे मेसेज मोबाइलवर आल्यानंतर त्यांनी एटीएम कार्ड तपासले. त्यांच्याकडे असलेले एटीएम कार्ड बनावट असल्याचे लक्षात आल्यानंतर भिंगार पोलिस स्टेशन गाठत त्यांनी फिर्याद नोंदविली.
घरकुलाच्या नावाखाली फसवणूक
शहरातील हातमपुरा येथे घरकुल मंजूर झाल्याचे खोटे सांगून दहा हजार रुपये घेऊन सुधा डेव्हिड तडके या वृद्ध महिलेची फसवणूक झाली आहे. त्यांच्या फिर्यादीवरून उदय शेळके (पूर्ण नाव नाही) नावाच्या व्यक्तीविरुद्ध कोतवाली पोलिस स्टेशनला गुन्हा नोंदविण्यात आला आहे. गुरुवारी दुपारी तडके घरात असताना उदय शेळके नावाचा व्यक्ती त्यांच्या घरी आला. तुमचा घरकुलाला नंबर लागला असून, त्याचे चेक घेऊन आलो असल्याचे शेळके याने सांगितले. त्यासाठी दहा हजार रुपयांची मागणी केल्यानंतर तडके यांनी शेळकेला दहा हजार रुपये दिले; परंतु शेळके नावाची व्यक्ती चेक न देताच निघून गेला होता, असे फिर्यादीत म्हटले आहे.