टॅक्सी आणि रिक्षाचालक मीटरमध्ये इलेक्ट्रॉनिक सर्किट बसवून मीटर रिडींग वाढवून प्रवाशांची फसवणूक करणाऱ्या चार रिक्षाचालकांना गुन्हे शाखेच्या अधिकाऱ्यांनी शुक्रवारी अटक केली. गुन्हे शाखा युनिट ९ च्या पथकाने बोरिवली स्थानकाजवळ ही कारवाई केली. यामध्ये मोठे रॅकेट सक्रिय असून आणखी काही रिक्षांच्या मीटरमध्ये अशाप्रकारे छेडछाड करण्यात आल्याची शक्यता व्यक्त केली जात आहे.
टॅक्सी आणि रिक्षामध्ये बटनद्वारे भाडेवाढ केली जात असल्याचे अनेक व्हिडीओ सध्या सोशल मीडियावर प्रचंड वायरल होत आहेत. बोरिवली स्थानकाच्या पूर्वेला मोठ्या संख्येने रिक्षा प्रवाशांना घेण्यासाठी उभ्या असतात. मात्र यातील अनेक रिक्षाचालक मीटरमध्ये इलेक्ट्रॉनिक सर्किट बसवून रिडींगचा वेग वाढवत असल्याची माहिती युनिट ९ चे पोलिस कॉन्स्टेबल राजेंद्र पेडणेकर यांना मिळाली. या माहितीची शहानिशा करण्यासाठी वरिष्ठ पोलिस निरीक्षक महेश देसाई यांच्या मार्गदर्शनाखाली निरीक्षक आशा कोरके यांच्या पथकाने या ठिकाणी उभ्या असलेल्या अनेक रिक्षांना एकाच वेळी घेराव घातला. पोलिसांच्या अचानक पडलेल्या छाप्यामुळे रिक्षाचालक बिथरले. यातील संशयास्पद वाटणाऱ्या चालकांना रिक्षासह ताब्यात घेऊन कार्यालयात आणण्यात आले. अंधेरी येथील प्रादेशिक परिवहन विभागातील अधिकाऱ्यांकडून रिक्षाची तपासणी तसेच मीटरची चाचणी करण्यात आली. त्यावेळी प्रदीप शिर्के, संजय शेरकर मो. बिलाल मन्सूर, अमीन पठाण या चौघांनी मीटरमध्ये सर्किट बसवल्याचे उघड झाले. त्याचबरोबर एक बटन बसवून रिडींगचा वेग वाढवला जात होता.
मीटरमध्ये छेडछाड प्रकरणी चौघांविरुद्ध फसवणूक तसेच महाराष्ट्र मोटर वाहन कायद्याच्या विविध कलमांन्वये गुन्हा दाखल करण्यात आला आहे. हे चौघे एका टोळीत कार्यरत असून यामध्ये सहभागी असलेल्या इतर रिक्षाचालकांचा पोलिस शोध घेत आहेत. प्रवाशांनी देखील सतर्क राहावे आणि बटनद्वारे कुणी मीटरचा वेग वाढवताना निदर्शनास आल्यास त्वरित कळवावे, असे आवाहन पोलिसांनी केले आहे.