अमेरिकेच्या राष्ट्राध्यक्षांचे निवासस्थान असलेल्या व्हॉइट हाऊसपासून जवळ असलेल्या वॉशिंग्टनमधील रस्त्यांवर झालेल्या अंदाधुंद गोळीबारात एक ठार, तर इतर सहा जण जखमी झाल्याचे वृत्त आहे. ही घटना काल (गरुवारी) रात्री घडली. हा हल्ला कुणी केला, किंवा हा दहशवादी हल्ला आहे का, याबाबत अद्याप काहीही कळू शकलेले नाही.एबीसी ७ न्यूज- डब्ल्यूजेएलए या वृत्तवाहिनीने हे वृत्त दिले आहे. या वाहिनीने याबाबतचे ट्विट केले असून यात हल्ल्यात जखमी झालेल्यांना रुग्णालयात नेणाऱ्या रुग्णवाहिका दिसत आहेत. हा हल्ला व्हॉइट हाऊसपासून तीन किमीच्या अंतरावर असलेल्या कोलंबिया रोडवर झाल्याचे या वृत्तवाहिनीने म्हटले आहे.
रॉयटर्स या वृत्तसंस्थेने दिलेल्या हल्ल्याच्या वृत्तात हा हल्ला भारतीय वेळेनुसार गुरुवारी रात्री १० वाजता झाला. हा हल्ला झाला तेव्हा पोलीस तत्काळ घटनास्थली पोहोचू शकले नाहीत. तसेच अग्निशमन दलाचे जवानांनीही या हल्ल्याबाबत अद्याप माहिती दिलेली नाही. यामुळेच या हल्ल्यात जखमी झालेल्यांची स्थिती नेमकी कशी आहे, याबाबतही माहिती मिळू शकलेली नाही असे रॉयटर्सने म्हटले आहे.