दुसऱ्या जातीतील मुलीशी प्रेमसंबंध असल्याच्या कारणावरून एका २० वर्षीय तरुणाला जिवंत जाळण्यात आल्याची घटना शनिवारी रात्री घडली. ही माहिती समजल्यानंतर हॉस्पिटलमध्ये आजारी असलेल्या मृत तरुणाच्या आईचाही मृत्यू झाला. उत्तर प्रदेशातील हरदोई जिल्ह्यात हा प्रकार घडला. हा प्रकार ऑनर किलिंगचा असून, या प्रकरणी पाच जणांना अटक करण्यात आली आहे. त्यामध्ये मुलीच्या नातेवाइकांसह शेजाऱ्यांचाही समावेश असल्याची माहिती पोलिसांनी दिली.
अभिषेक उर्फ मोनू (वय २०) असे मृत तरुणाचे नाव असून, तो उत्तर प्रदेशातील हरदोई जिल्ह्यातील भाडेसा भागात राहत होता. त्याचे त्याच भागातील एका तरुणीशी गेल्या सहा वर्षांपासून प्रेमसंबंध होते. या संबंधी मुलीच्या घरच्यांना माहिती मिळाली. तेव्हापासून ते मोनूच्या मागावर होते. मोनूची आई आजारी असल्याने ती हॉस्पिटलमध्ये दाखल केले होती. घटनेच्या दिवशी शनिवारी मोनूने आईच्या आजारपणासाठी २५ हजार रुपये बँकेतून काढले. त्यानंतर तो संबंधित तरुणीला भेटून घरी जात असताना संबंधित तरुणीच्या नातेवाइकांनी त्याला शिवीगाळ करण्यास सुरुवात केली. यातून वाद वाढला आणि मुलीच्या नातेवाइकांनी त्याला एका घरात डांबले आणि घरावर रॉकेल टाकून आग लावली. त्यात तो होरपळून मृत्युमुखी पडला.