बीडमध्ये सोमवारी अनोखी अंत्ययात्रा पाहावयास मिळाली. या अंत्ययात्रेत महिला सहभागी झाल्या होत्या. यावेळी सुनांवर आयुष्यभर मुलींप्रमाणे प्रेम केलेल्या सासूच्या पार्थिवाला चार सुनांनी खांदा दिला.
बीड शहरातील काशिनाथनगर भागात सुंदराबाई दगडू नाईकवाडे यांचे वृद्धापकाळाने सोमवारी निधन झाले. त्यांनी आपल्या जीवनात मुली आणि सून हा भेद कधीच केला नाही. त्यांनी सुनांवर आयुष्यभर मुलींप्रमाणे प्रेम केले. सुनेला मुलगी मानून आईची माया लावली. त्यामुळे त्यांच्या मृत्युनंतर चार ही सुना दुःखी झाल्या. सासरी माया लावणाऱ्या सासू सुंदराबाईंच्या अंत्ययात्रेत सुना सहभागी होऊन त्यांनी सुंदराबाईच्या पार्थिवास खांदा दिला. सुना लता नवनाथ नाईकवाडे, उषा राधाकिसन नाईकवाडे, मनीषा जालिंदर नाईकवाडे आणि मीना मच्छिंद्र नाईकवाडे यांनी पुढे होऊन सासूबाईंच्या पार्थिवास खांदा दिला.