मुंबई, ठाणे आणि पालघर परिसरात सलग दुसऱ्या दिवशी पावासाची संततधार सुरुच आहे. तर पुण्यात धरणक्षेत्रात पावसाने दमदार हजेरी लावली आहे.
मुंबईची ‘लाइफलाईन’ लोकल सेवा सध्या सुरळीत सुरू आहे. पश्चिम आणि हार्बर मार्गावरील रेल्वे गाड्या वेळेवर सुरू असून मध्य रेल्वेवरील वाहतूक १५ ते २० मिनिटं उशिराने सुरू आहे. पावसाची रिपरिप सुरुच असल्याने सखल भागांता पाणी साचण्यास सुरूवात झाली आहे. तर रस्ते वाहतुकीचाही वेग मंदावला आहे. ठाणे जिल्ह्याला पावसाने रात्रभर चांगलच झोडपून काढलं आहे.
पुण्यात मुसळधार
पुण्यात धरण क्षेत्रात मुसळधार पाऊस सुरू असल्याने खडकवासला धरणाचे दरवाजे उघडण्यात आले आहेत. खडकवासलातून २२ हजार ८८० क्युसेक वेगाने पाण्याचा विसर्ग सुरू आहे. पाण्याचा विसर्ग आणखी वाढण्याची शक्यता असून नदी काठच्या गावांना सतर्कतेचा इशारा देण्यात आला आहे. पेठा आणि डेक्कनला जोडणारा पूल पाण्याखाली गेला आहे.