शहरात गेल्या महिन्यापासून सुरू असलेल्या चोऱ्या, घरफोड्यांचे सत्र सुरूच आहे. सोमवारी (दि. २६) मध्यरात्री जिल्हापेठ पोलिस ठाण्यासमोरील मेडिकल फोडून कपाटातील ड्रॉवरमधून सव्वा लाख रुपयांची रोकड चोरट्यांनी लंपास केली. मंगळवारी (दि. २७) सकाळी आठ वाजता दुकान उघडण्यासाठी मालक आले असता ही घटना उघडकीस आली.
एकाच रात्री अनेक बंद घरे फोडल्याच्या घटनादेखील शहरात झाल्या आहेत. हे सत्र थांबविण्याचे पोलिसांचे सर्वच प्रयत्न सपशेल अपयशी झाले आहेत. जिल्हापेठ पोलिस ठाण्यासमोरील भास्कर मार्केटमध्ये नाहाटा हॉस्पिटल आहे. या हॉस्पिटलच्या बाहेर वर्धमान ड्रग हाऊस हे दिनेश व्यास यांचे मेडिकल आहे. सोमवारी रात्री १०.३० वाजता व्यास यांनी दुकान बंद करून ते घरी गेले. यानंतर मंगळवारी सकाळी ८ वाजता ते मेडिकल दुकान उघडण्यासाठी आले. या वेळी दुकानाचे कुलूप आधीच उघडलेले असल्याचे त्यांना दिसून आले. त्यांनी आत जाऊन तपासणी केली असता काऊंटरवर पायाचे ठसे दिसून आले. तसेच ड्रॉवरमधील १ लाख ३३ हजार रुपयांची रोकडदेखील गहाळ असल्याचे समोर आले. दुकानात चोरी झाल्याची खात्री झाल्यानंतर व्यास यांनी जिल्हापेठ पोलिस ठाण्यात जाऊन तक्रार दिली. त्यानुसार गुन्हा दाखल करण्यात आला आहे. हॉस्पिटलबाहेर सीसीटीव्ही कॅमेरे आहेत. परंतु, व्यास यांच्या मेडिकल दुकानाच्या बाजूने डायरेक्शन नसल्यामुळे त्यात चोरटे दिसून आलेले नाही. मुख्य रस्त्यावरील दुकानात चोरी झाल्यामुळे परिसरातील नागरिक भयभीत झाले आहेत.