बीएआरसीमधील ६३वर्षीय निवृत्त शास्त्रज्ञाला काही दिवसांपूर्वी रस्त्यात अपघात झाला होता. त्यांना नवी मुंबईच्या महात्मा गांधी हॉस्पिटलमध्ये उपचारांसाठी दाखल केले होते. डॉक्टरांनी त्यांना ब्रेनडेड घोषित केले. या शास्त्रज्ञाने मृत्युपश्चात अवयवदान करण्याची इच्छा व्यक्त केली होती. त्यामुळे जवळच्या नातेवाईकांनी त्यांच्या अवयवांचे दान करण्याचा निर्णय घेतला. हृदय, किडनी, लिव्हर, डोळे, स्वादुपिंड अशा सर्व अवयव गरजूंच्या जीवदानासाठी देण्याचे निश्चित झाले.
चेंबूरच्या अणुशक्ती नगरमधील एका ब्रेनडेड वैज्ञानिकाच्या नातेवाईकांनी हृदयदानाबरोबर दोन्ही किडनी, लिव्हर, दोन्ही डोळे आणि स्वादूपिंडाचे दान करून नवा सामाजिक दृष्टिकोन रुजवला आहे. एका ब्रेनडेड पेशंटने किमान चार जणांना नवे जीवन आणि दोघांना दृष्टी दिली. या अनोख्या अवयवदानाची माहिती समजताच शुक्रवारी सकाळी वाहतूक पोलिसांनी पुन्हा ‘ग्रीन कॉरिडोर’ अवलंबून वाशीतील या ब्रेनडेड पेशंटचे हृदय १४ मिनिटांत मुलुंडच्या फोर्टिस हॉस्पिटलमध्ये नेले, तर इतर अवयव वेगवेगळ्या हॉस्पिटलांमध्ये रवाना करून गरजू पेशंटना नवे आयुष्य दिले. विशेष म्हणजे पाच दिवसांपूर्वी याच हॉस्पिटलमध्ये असेच एक हृदयरोपण झाले होते.