पावसाने आज उसंत घेतल्याने काल मुसळधार पावसामुळे घरात राहिलेले नागरिक आज कामावर जाण्यासाठी घराबाहेर निघाल्याने, तसेच मध्य रेल्वेही विलंबाने धावत असल्याने मुंबईच्या पूर्व दृतगती महामार्गावर मोठी वाहतूक कोंडी झाली आहे. या मुळे मुलुंड ते विक्रोळीदरम्यान सुमारे ७ किमीपर्यंत वाहनांच्या रांगा लागल्या आहेत.
काल मुंबईतील रेल्वेसेवा पूर्णपणे कोलमडल्यानंतर आज अनेक गाड्यांना सुटी देत मध्य रेल्वेने आज रविवारच्या वेळापत्रकानुसार लोकल वाहतूक सुरू ठेवली आहे. गाड्यांची संख्या कमी झाल्याने अनेकांनी कार, टॅक्सी अथवा बसने जाणे पसंत केले आहे. अशात अनेक रस्त्यांची अवस्था खराब आहे. अनेक ठिकाणी खड्डेही पडले आहेत. या मुळे मुंबईत काही ठिकाणी वाहतुकीचे मार्गही बदलण्यात आले आहेत. याच कारणामुळे मुंबईकडे येणाऱ्या रस्त्यांवर मोठी वाहतूक कोंडी झालेली दिसत आहे. विक्रोळी ते घाटकोपरदरम्यानही वाहनांच्या रांगा लागल्या असून फ्रीवेवर देखील वाहतूक कोंडी झाली असल्याची माहिती मिळत आहे.