बिग बॉसच्या घरात प्रवेश केल्यानंतर पहिल्याच दिवसांपासून सततच्या वादामुळे चर्चेत असलेल्या शिवानी सुर्वेला बिग बॉसने डच्चू दिला आहे. शनिवारी झालेल्या विकेंडच्या डावात सूत्रसंचालक महेश मांजरेकरांनी शिवानी सुर्वेला घर सोडण्याचे निर्देश दिले.
मागील काही दिवसांपासून शिवानी सुर्वेची घरातील इतर सदस्यांसोबत जोरदार खडाजंगी होत होती. त्यानंतर तिने थेट बिग बॉसशीच पंगा घेतला. मला बिग बॉसच्या घरात राहणं आता सहन होत नाहीए. त्या घरात सतत होणारी भांडणं, त्यामुळे अनावर होणारा राग या सगळ्याचा परिणाम मानसिक आणि शारीरिक स्वास्थ्यावर होतोय असं शिवानीचं म्हणणं होतं. मला बिग बॉसच्या घरातून बाहेर काढा अशी विनंती ती वारंवार करत आहे. परंतु, अनेकदा सांगूनही बिग बॉस ऐकत नसल्याने तिनं घरातच बंड पुकारायला सुरुवात केली होती. मला या घरातून बाहेर काढा अन्यथा मी बिग बॉसवर कायदेशीर कारवाई करेल अशी धमकीही तिने दिली होती. त्यानंतर बिग बॉसनेही तिला कायदेशीर कारवाई करण्याचा इशारा दिल्यानंतर शिवानी वरमली होती. मात्र, पुन्हा काही दिवसानंतर शिवानीचे घरात राहण्याबाबत तळ्यात मळ्यात सुरूच होते. एका क्षणाला मला या घरातून काढा आणि दुसऱ्या क्षणाला मला या घरात राहायचे नाही असं शिवानी बिग बॉसला सांगत होती. त्यामुळे विक एंडच्या डावात काय होणार, याकडे प्रेक्षकांचे लक्ष लागले होते.
विक एंडच्या डावात सूत्रसंचालक महेश मांजरेकर यांनी शिवानी सुर्वेकडून स्पष्टीकरण घेतले. नेमके काय सुरू होते आणि कोणी कसे वागले यावर घरातील इतर सदस्यांना बोलते केले. शिवानीला घरात राहण्याची इच्छा नसताना तिला या घरात राहण्याचा आग्रह का केला यावर मांजरेकरांनी माधव देवचके आणि विद्याधर जोशींना खडसावले. अखेर स्टोअर रुममधील बॅग घेऊन सामानाची आवराआवर करण्याची सूचना महेश मांजरेकरांनी शिवानी सुर्वेला केली. शिवानी सुर्वे घरातून जाताना इतर सदस्यांनी तिला निरोप दिला नाही.