जम्मू-श्रीनगर हायवेवर सीमरोली येथे बुधवारी पाकिस्तानातून आलेल्या नावेद आणि नोमन उर्फ मोमीन या दहशतवाद्यांनी बीएसएफच्या (सीमा सुरक्षा बल) ताफ्यावर सकाळी आठच्या सुमारास अंदाधुंद हल्ला केला. या हल्ल्याला जवानांनी चोख प्रत्युत्तर देत नोमन याचा खात्मा केला. मात्र, नावेद पळून जाण्यात यशस्वी झाला. त्याने तेथून पळ काढत जवळच्या गावातील पाच गावकऱ्यांना एका शाळेच्या इमारतीत ओलीस ठेवले. ओलिसांपैकी तिघे पळून जाण्यात यशस्वी ठरले. तर उरलेल्या दोघांनी त्याच्याशी दोन हात करून त्याला पकडले. गावकऱ्यांनी पोलिसांना खबर दिल्यानंतर त्याला ताब्यात घेण्यात आले. गुरुदासपूर हल्ल्यानंतर आठवड्याच्या आतच हा दुसरा हल्ला आहे. या हल्ल्यात कॉन्स्टेबल रॉकी आणि सुभेंदू रॉय शहीद झाल्याची माहिती केंद्रीय गृहमंत्री राजनाथ सिंह यांनी दिली.
नावेद म्हणतो…
”मी हिंदूंना मारण्यासाठी आलोय. पाकिस्तानात फैसलाबादला राहतो. जम्मूत येऊन बारा दिवस झाले. माझ्याबरोबर मोमीन खानही होता. तो मारला गेलाय. दहशतवादी कारवाया करताना मजा येते, समजा मीही मारला गेलो तर ती अल्लाहची मर्जी”
नावेदने (२०, फैसलाबाद, पाकिस्तान) सुरुवातीला आपले नाव कासीम तर नंतर उस्मान असल्याचे सांगितले होते. त्यानंतर त्याने आपले नाव मोहम्मद नावेद असल्याचे सांगितले. तो चार दहशतवाद्यांसह महिनाभरापूर्वी कुपवाडामार्गे काश्मीरमध्ये आला होता. मात्र, तो परत पाकव्याप्त काश्मीरमध्ये गेला. अटक करण्यात आलेला नावेद प्रसिद्धीमाध्यमांच्या कॅमेऱ्यांसमोर अनेकदा विकृतपणे हसला. अटकेनंतरही त्याचा चेहरा निर्विकार होता.