तामिळनाडूची राजधानी चेन्नईत पोलिसांनी एका अशा व्यक्तीला अटक केली असून त्या व्यक्तीची विकृती पाहून डोके चक्रावून गेल्याशिवाय राहात नाही. ही व्यक्ती पुरुषांसोबत गे सेक्स केल्यानंतर त्यांची गुप्तांगे कापायची, असा या अटक करण्यात आलेल्या व्यक्तीवर आरोप आहे. सीसीटीव्ही फूटेजच्या आधारे पोलिसांनी या विकृत व्यक्तीला अटक केली. के. मुनियासामी असे या आरोपीचे नाव असून त्याची रवानगी तुरुंगात करण्यात आली आहे.
पोलिसांनी या बाबत माहिती देताना सांगितले की, त्यांना २५ मे रोजी रेट्टेरीमध्ये बाशा नावाची व्यक्ती बेशुद्धावस्थेत आढळली होती. या व्यक्तीचे गुप्तांग कापण्यात आले होते. या व्यक्तीला हॉस्पिटलमध्ये दाखल करण्यात आले. एका दारू प्यायलेल्या व्यक्तीने आपल्यासोबत सेक्स केला आणि त्यानंतर आपले गुप्तांग कापले, असे या व्यक्तीने शुद्धीवर आल्यानंतर सांगितले. आठवडाभरानंतर या व्यक्तीचा हॉस्पिटलमध्ये मृत्यू झाला. पोलिसांनी या प्रकरणी गुन्हा दाखल केला.
सीसीटीव्ही फूटेजमुळे मिळाले पुरावे
नारायण पेरुमल या व्यक्तीचेही गुप्तांग कापल्याचे प्रकरण १ जून रोजी पोलिसांसमोर आले. हा गे सेक्सचा प्रकार असावा असा संशय पोलिसांना आला. पोलिसांनी सीसीटीव्ही फूटेज तपासले असता दोन्ही प्रकरणांमध्ये एकच व्यक्ती असल्याचे पोलिसांना आढळले. हे सीसीटीव्ही फूटेज वृत्त वाहिन्यांवर दाखवण्यात आल्याची माहिती पोलिसांनी अतिरिक्त आयुक्त आर. दिनकरन यांनाही दिली.
सीसीटीव्ही फूटेज पाहिल्यानंतर विल्लिवक्कम मासळी बाजारचे निरीक्षक पी. जवाहर यांना एका दुकानदाराकडून फोन आला. टीव्हीवर दाखवण्यात येत असलेली व्यक्ती आपल्या दुकानात काम करते अशी माहिती या दुकानदाराने पोलिसांना दिली. त्यानंतर पोलिसांनी मुनियासामीला अटक केली.
दारूच्या नशेत करायचा कृत्य
आपण दारूच्या नशेत हे कृत्य करत असल्याचे मुनियासामी याने पोलिसांना सांगितले. तो आसपासच्या परिसरात जाऊन एकट्या व्यक्तीला सेक्ससाठी उद्युक्त करत असे. गे सेक्स केल्यानंतर तो त्या व्यक्तीचे गुप्तांग कापत असे. शाळेत असताना आपण गे सेक्स करण्याबाबत शिकलो होतो. लहानपणी आपण काही मित्रांसोबत गे सेक्स करत असू, अशी माहिती मुनियासामी याने पोलिसांना दिली.