ठाण्यातील नौपाडा येथील ‘कृष्णा निवास’ जमीनदोस्त होऊन १२ जणांना जीव गमवावा लागला. क्षणार्धात घडलेल्या या दुर्घटनेत रहिवाशांचे आयुष्य उद्ध्वस्त झाले. मात्र इमारतीचा ढिगारा उपसताना सुमारे ७० तोळे दागिने आणि इतर मौल्यवान वस्तू तसेच २ लाख ७० हजारांची रोकड बचाव पथकाच्या हाती लागली.
इमारत पडल्यानंतर अनेकदा तेथील रहिवाशांच्या मौल्यवान वस्तू चोरण्याचा प्रयत्न होतो. असे प्रकार रोखण्यासाठी कळव्यात एका इमारतीच्या ढिगाऱ्यावर चक्क सीसीटीव्हीद्वारे काही दिवस पाळत ठेवण्यात आली होती. ‘कृष्णा निवास’ इमारतीप्रकरणी बचावकार्यात ‘एनडीआरएफ’ तसेच फायर ब्रिगेडबरोबरच पोलिसांनीदेखील अत्यंत चोख कामगिरी बजावली, नौपाडा पोलिसांनी वेगवेगळी पथके तयार करून इमारतीतील रहिवाशांच्या मौल्यवान वस्तू गहाळ होणार नाहीत, याची पुरेपूर दक्षता घेतली. इमारतीचा ढिगारा ज्या डम्पिंग ग्राऊंडवर टाकला जात होता, तिथेही पोलिसांचे एक पथक लक्ष ठेऊन होते. या पथकालाही काही मौल्यवान वस्तू आढळल्यावर त्या सुरक्षित ठेवण्यात आल्या. आता संबंधितांनी आवश्यक पुरावे देऊन या वस्तू आपल्या ताब्यात घ्याव्यात, असे आवाहन नौपाड्याचे सीनिअर इन्स्पेक्टर एम. डी. सुरवसे यांनी केले आहे.