आठवी ते दहावीपर्यंत जेलरोडच्या होली फ्लॉवर इंग्लिश मीडियम स्कूलमध्ये शिक्षण घेत असल्याचा आणि दहावीची परीक्षाही दिल्याचा एका विद्यार्थ्याने रचलेला बनाव निकाल लागल्यानंतर उघडकीस आला आहे. याबाबतची कुणकुणही या पठ्ठ्याने घरी पालकांना लागू दिली नव्हती. मात्र, दहावीचा निकाल आणण्यास जातो असे सांगून घरातून गेलेला मुलगा न परतल्याने त्याच्या पालकांनी होली फ्लॉवर शाळेत जाऊन चौकशी केल्यानंतर ही बाब उघडकीस आली.
मित्रासमवेत दहावीच्या परिक्षेचा निकाल घेण्यासाठी गेलेला सुमित (नाव बदलले आहे. वय १७, रा. बाभळेश्वर, ता. जि. नाशिक) घरी न परतल्याने तो बेपत्ता झाल्याची तक्रार सुमितचा भाऊ निखिल याने रविवारी (दि. ९) सकाळी नाशिकरोड पोलिस ठाण्यात दिली होती. निखिलच्या तक्रारीनुसार शनिवारी (दि. ८) सुमित बाभळेश्वर येथून एका मित्रासमवेत दुचाकीवरुन पळसे गावात दहावीचा निकाल बघण्यासाठी गेला होता. त्याने सुमितला पळसे बस स्टॉपवर सोडले. मात्र, तो उशिरापर्यंत घरी न पोहचल्याने त्याचा भाऊ निखिल आणि आईने त्याचा शोध घेतला. परंतु, तो सापडला नाही.
तीन वर्षे तो काय करीत होता?
सुमितने सातव्या इयत्तेनंतर माध्यमिक शाळेत आठवीच्या वर्गात प्रवेशच घेतलेला नव्हता, असा खुलासा होली फ्लॉवर स्कूलच्या प्रशासनाने केला आहे. परंतु, त्याच्या पालकांना याबाबत माहिती नव्हती. मग तो तीन वर्षे कोणत्या शाळेत जात होता, काय करीत होता, हे प्रश्न अनुत्तरीत असून त्याच्या पालकांसह नातेवाईकांची या प्रकारामुळे झोप उडाली आहे. रविवारी सायंकाळी होली फ्लॉवर शाळेच्या प्रशासनाने सुमितचे पालक आणि नातेवाईकांसमक्ष शाळेत रेकॉर्ड तपासून त्याचे ॲडमिशन सातवीनंतर झालेलेच नसल्याची खात्री करून दिली. शाळेत प्रवेशच नसल्याने दहावीचा निकाल पालकांना कसा द्यायचा, या चिंतेने रोहितने घरी येणे टाळल्याची शक्यता आहे.
सुमित जेलरोडच्या होली फ्लॉवर इंग्लिश मीडियम स्कूलमध्ये नियमित जात होता. त्याच शाळेत शिक्षण घेत असलेल्या मावस बहिणीशीही त्याची भेट होत असे. त्याच्याकडे या शाळेचा गणवेशही होता.
– निखिल, तक्रारदार
सुमित (बदललेले नाव) हा विद्यार्थी आमच्या संस्थेच्या शाळेत इयत्ता सातवीपर्यंत शिक्षण घेत होता. शाळेच्या रेकॉर्डनुसार आठवीच्या वर्गात त्याने प्रवेशच घेतलेला नव्हता.
– सुदीप देव, चेअरमन, होली फ्लॉवर स्कूल