आठवड्याची अखेरही पेट्रोल व डिझेलच्या दरकपातीनेच झाली आहे. रविवारी सलग चौथ्या दिवशी पेट्रोल व डिझेलच्या दरात कपात करण्यात आली. पेट्रोलचे दर प्रतिलिटर १६ पैशांनी तर, डिझेलचे दर प्रतिलिटर १५ पैशांनी कमी करण्यात आले. या कपातीनंतर मुंबईत पेट्रोल व डिझेलचे दर प्रतिलिटर अनुक्रमे ७६.२५ व ६७.६३ रुपये नोंदविण्यात आले. तर नवी दिल्लीत हे दर अनुक्रमे ७०.५६ व ६४.५ रुपयांपर्यंत खालावले.
आंतरराष्ट्रीय बाजारात कच्च्या इंधनाच्या दरात झालेल्या घसरणीचा भारताला लाभ झाला आहे. ब्रेण्ट क्रूड ऑइलचे दर प्रतिबॅरल ६२ अमेरिकी डॉलरपर्यंत घसरले आहेत. यामुळे ३० मेनंतर इंधनाच्या दरांत सतत कपात केली जात आहे. गेले चार दिवस ही कपात अखंड होत असून या चार दिवसांत पेट्रोलचे दर ६७ पैशांनी तर डिझेलचे दर ९१ पैशांनी घटले आहेत.
इराणकडून चोरीछुपे विक्री
अमेरिकेने लादलेल्या आर्थिक निर्बंधांनंतर इराणचा इंधननिर्यातीमध्ये कमालीची घट झाली आहे. इराणकडून एक थेंबही इंधन घेऊ नये, असा इशारा अमेरिकेने दिल्याने भारतासह अनेक देशांनी गेल्या महिन्यापासून इराणकडून होणारी आयात बंद केली आहे. या पार्श्वभूमीवर ‘सद्यस्थितीत आम्ही अपारंपरिक, अनधिकृत मार्गाने इंधनविक्री करत आहोत’, असे इराणचे पेट्रोलियममंत्री बिजान झांगनेह यांनी सांगितले. ही विक्री अमेरिकेच्या लक्षात आल्यास ते तातडीने त्यावरही बंदी घालतील म्हणून हा व्यवहार गोपनीय राखण्यात आला आहे, असेही ते म्हणाले. मात्र या मार्गाने कोणत्या देशांना इंधनविक्री केली जात आहे हे त्यांनी सांगितले नाही.