कोंढवा बुद्रुक परिसरातील सख्या लहान भावाचे बंद घर बनावट चावीने फोडणाऱ्याला गुन्हे शाखेच्या युनिट एकने चोवीस तासांत अटक केली. त्याच्याकडून घरफोडीतील दोन लाख सत्तर हजार रुपयांचा ऐवज जप्त केला.
अरीफ शफी शेख (वय ३६, रा. कोंढवा बुद्रुक) असे अटक करण्यात आलेल्याचे नाव आहे. कोंढवा खुर्द भागातील टेम्पल टॉवरमधील बंद फ्लॅटमध्ये घरफोडीचा प्रकार घडला होता. या ठिकाणाहून चोरट्यांनी दोन लाख ११ हजार रुपयांचा ऐवज चोरला होता. या बाबत मौसिन अरीफ शेख (वय २८) यांनी कोंढवा पोलिसांकडे तक्रार दिली होती. त्यानुसार अज्ञात व्यक्तीवर गुन्हा दाखल करण्यात आला होता. या गुन्ह्याचा समांतर तपास गुन्हे शाखा करत होती. यावेळी गुन्हे शाखेच्या युनिट तीनमधील कर्मचारी विल्सन डिसुझा यांना हा गुन्हा तक्रारदार यांचा भाऊ अरीफने केल्याची माहिती मिळाली. तसेच, तो दागिने विक्री करण्यासाठी लष्कर भागात येणार असल्याची माहिती मिळाली.
गुन्हे शाखेचे अतिरिक्त पोलिस आयुक्त अशोक मोराळे, पोलिस उपायुक्त संभाजी कदम, वरिष्ठ निरीक्षक राजेंद्र मोकाशी, उपनिरीक्षक संजय गायकवाड यांच्या पथकाने सापळा रचून त्याला पकडले. त्याच्याकडे चौकशी केली असता त्याने प्रथम उडवा-उडवीचे उत्तर दिले. त्याला सखोल तपास केला असता त्याने गुन्ह्याची कबूली दिली. त्यानुसार, त्याला अटक करण्यात आली आहे.