आंबट आंबे घेण्यास ग्राहकाने नकार दिल्यानंतर ग्राहक आणि विक्रेता यांच्यात झालेल्या वादात आंबा विक्रेता आणि त्याच्या भावाने ग्राहकाला ठोशाबुक्याने मारहाण केली. तसेच लोखंडी वजनही फेकून मारल्याने ग्राहकाच्या कपाळाला दुखापत झाल्याची घटना मंगळवारी रात्री वागळेइस्टेटमध्ये घडली. आंबा विक्रेत्यासह दोघांविरुद्ध श्रीनगर पोलिस ठाण्यात गुन्हा दाखल करण्यात आला आहे.
वागळे इस्टेटमधील इंदिरानगरमध्ये राहणारे सुरेश जाधव (४०) मजुरीचे काम करतात. मंगळवारी रात्री दहा वाजता येथील आंब्याच्या गाडीवरून आंबे विकत घेण्यासाठी थांबले. विक्रेत्याकडे एक किलो आंब्याची मागणी केल्यांनतर यावेळी एक महिला देखील आंबे विकत घेत होती. आंबा विक्रेत्याने या महिलेला आंब्याची एक फोड कापून दिल्याने जाधव यांनी आंबा गोड आहे का याबाबत महिलेकडे विचारणा केली. त्यावेळी महिलेने आंबा आंबट असल्याचे सांगितल्याने जाधव यांनी आंबे विकत घेण्यास नकार दिला. यावरून झालेल्या वादानंतर विक्रेत्याने जाधव यांना शिवीगाळ केली. हा वाद वाढत गेला आणि विक्रेत्याने त्याच्या साथीदाराच्या मदतीने जाधव यांनामारहाण केली. विक्रेत्याने गाडीवरील लोखंडी वजन फेकून मारल्याने जाधव यांच्या कपाळाला दुखापत झाली. नंतर दोघेही आरोपी पळून गेली. जाधव यां[नी आसपास चौकशी केल्यांनतर आंबा विक्रेत्याचे नाव मोहम्मद गोरे उर्फ मोईद मोहम्मद गुलाब राईन (२७) असल्याचे समोर आले. दुसरा आरोपी हा त्याचाच भाऊ असून त्याचे नाव इरशाद उर्फ दिलशाद उर्फ इसान मोहम्मद गुलाब राईन (२२) आहे. जाधव यांच्या तक्रारीनंतर या दोघाविरुद्ध गुन्हा दाखल करण्यात आला आहे.