भांडुपमधील वाढत्या गुन्हेगारीवर काही प्रमाणात नियंत्रण मिळविण्यात पोलिसांना यश येत असतानाच गुरुवारी शहर पुन्हा हादरले. युवा क्रिकेटपटू म्हणून भांडुप-मुलुंडमध्ये परिचित असलेल्या राकेश अंबादास पवार (३५) याची तिघांनी गुरुवारी रात्री येथील एका पेट्रोलपंपावर हत्या केली. तिन्ही मारेकऱ्यांची ओळख पटल्याचे पोलिसांनी म्हटले आहे.
राकेशची हत्या पूर्व वैमनस्यातून झाल्याचा अंदाज पोलिसांनी व्यक्त केला आहे. तिन्ही मारेकऱ्यांची ओळख पटली आहे. तिन्ही आरोपी राकेशच्या ओळखीचे असून सर्वजण याच परिसरात राहतात. त्यांच्यात काही महिन्यांपासून वाद सुरू होता. राकेशच्या भावाचा अपघात झाला होता. हा अपघात या तिघांनीच घडवून आणल्याचा आरोप राकेशने केला होता. यावरून त्यांच्यामध्ये अनेक दिवसांपासून धुसफूस सुरू होती.
हत्येच्या घटनेबाबत माहिती मिळताच भांडुप पोलिसांनी घटनास्थळी, पेट्रोल पंपावर धाव घेतली. रक्ताच्या थारोळ्यात पडलेल्या राकेशला मुलुंडच्या शासकीय रुग्णालयात नेण्यात आले. मात्र प्रचंड रक्तस्त्राव आणि डोक्याला जबर मार लागल्यामुळे दाखल करण्यापूर्वीच डॉक्टरांनी त्याला मृत घोषित केले.
याप्रकरणी भांडुप पोलिसांनी हत्येचा गुन्हा दाखल करून तपास सुरू केला. पेट्रोलपंप व परिसरातील सीसीटीव्ही फुटेजमध्ये ही घटना कैद झाली असून त्यावरून हल्लेखोरांची ओळख पटली असल्याचे पोलिसांनी म्हटले आहे. तिन्ही आरोपींना पकडण्यासाठी पोलिसांची वेगवेगळी पथके तयार करण्यात आली असून काही पथके राज्याबाहेरही गेली असल्याचे पोलिसांनी म्हटले आहे.
राकेश हा भांडुपच्या चंदनवाडी व्हिलेज रोड येथे पत्नी आणि दोन मुलांसोबत राहत होता. राकेश क्रिकेट खूप चांगल्या प्रकारे खेळायचा. त्याने अनेक जिल्हास्तरीय क्रिकेट स्पर्धेत भाग घेतला होता. सध्या तो लहान मुलांना प्रशिक्षणही देत होता. त्यामुळे भांडुप- मुलुंडमध्ये परिचित होता. शुक्रवारी सायंकाळी राकेशच्या पार्थिवावर अंत्यसंस्कार करण्यात आले. यावेळी स्थानिक नागरिक मोठ्या संख्येने उपस्थित होते.