साठीनंतरचे आयुष्य म्हणजे निवृत्तीचे वय, मुले-नातंवडासोबत रमण्याचाचा हा कालावधी असा अनेकांचा समज असतो. मात्र लक्ष्मीपुरीतील बांधकाम क्षेत्रांशी निगडीत व्यावसायिक रविंद्र बापू देशिंगे यांनी ७२ व्या वर्षी बारावीची परीक्षा दिली. जवळपास पन्नास वर्षानंतर पुन्हा शिकताना त्यांनी बारावीच्या परीक्षेत तीन विषयात यश मिळवले. उर्वरित तीन विषयासाठी ते येत्या जुलै महिन्यात पुन्हा परीक्षा देणार आहेत.
या वयात शिकण्याच्या जिद्दीविषयी सांगताना देशिंगे म्हणाले, ‘मुलीची मुलगी प्राची ही इंजिनीअर झाली. नात इंजिनीअरिंग करु शकते तर आपण पुन्हा का शिकू नये या विचाराने २०१७ मध्ये नाइट कॉलेज ऑफ आर्टस अँड कॉमर्समध्ये अकरावीसाठी प्रवेश घेतला. १९६३ मध्ये दहावीची परीक्षा दिली होती. १९६६ ते १९६८ या कालावधीत अॅटोमोबाइल डिप्लोमा केला. त्यानंतर व्यवसायात प्रवेश केला. जवळपास पन्नास वर्षांनी पुन्हा शिकताना रोज एक तास अभ्यास केला. बारावीची परीक्षा उत्तीर्ण होऊ हा विश्वास होता. मात्र तीन विषयात यश मिळवले, इतर विषयासाठी पुन्हा परीक्षा देणार आहे.’ त्यांच्या या जिद्दीचे शिक्षण मंडळातील अधिकाऱ्यांनी कौतुक केले. त्यांना विभागीय कार्यालयात बोलावून प्रोत्साहित केले.